ინფრასტრუქტურის მინისტრი რევაზ სოხაძე ინფრასტრუქტურული პროექტების მიმდინარეობის გასაცნობად სამცხე-ჯავახეთს სტუმრობდა. მათ შორის — ბორჯომს.
როგორც ცნობილია, „ქალაქებისა და კურორტების განვითარების პროგრამის“ ფარგლებში, ამჟამად ბორჯომში სამუშაოები ოთხ ქუჩაზე მიმდინარეობს.
დასკვნით ეტაპზეა ბორჯომის რკინიგზის სადგურისა და „ციცინათელას“ შენობის რეაბილიტაცია, მალე დასრულდება რუსთაველის ქუჩაზე ხუთი სხვადასხვა მრავალბინიანი საცხოვრებელი სახლის განახლების სამუშაოები.
ინფრასტრუქტურის მინისტრმა, რევაზ სოხაძემ, მოადგილეებთან და სამინისტროს თანამშრომლებთან ერთად, ბორჯომის #1 საბავშვო ბაღის რეაბილიტაციის დასრულებული სამუშაოები დაათვალიერა.
განახლებული ბაღი 150 აღსაზრდელზეა გათვლილი და სრულად ადაპტირებულია განსაკუთრებული საჭიროების მქონე ბავშვებისთვის სამცხე-ჯავახეთის რეგიონში, საერთო ჯამში, მიმდინარეობს 21 საბავშვო ბაღის მშენებლობა-რეაბილიტაცია.
პროექტების დასრულების შემდეგ რეგიონში მცხოვრები 1200-ზე მეტი ბავშვი თანამედროვე სტანდარტის, კეთილმოწყობილი ინფრასტრუქტურით ისარგებლებს.
ბორჯომსა და ახალციხეში უკვე დასრულდა 150 ბავშვზე გათვლილი საბავშვო ბაღების რეაბილიტაცია.
მინისტრი იმყოფებოდა ასევე ბორჯომის პარკში, სადაც მიმდინარეობს ძალიან მნიშვნელოვანი პროექტი.
“ ეს არ არის მხოლოდ რეკრეაციული სივრცის აღდგენა-რეაბილიტაცია. აქ არის ისტორიული და კულტურული მემკვიდრეობის მნიშვნელობის მქონე შენობები, რომლის რეაბილიტაციაც ძალიან მნიშვნელოვანია ჩვენი ქვეყნისთვის. ასევე, გაჩნდება ისეთი ატრაქციები, რომლის განვითარება არა მხოლოდ ზოგადად ტურიზმის, არამედ შიდა ტურიზმის გაძლიერებისთვის იქნება მნიშვნელოვანი. აღდგება ის ტრადიციული ობიექტები, რაც ამ პარკისთვის იყო ძალიან მნიშვნელოვანი.
ძველ თაობას, ალბათ, რომელსაც მეც წარმოვადგენ, ახსოვს ეს ყველაფერი და ვფიქრობ, რომ არა მხოლოდ ბორჯომელებისთვის, არამედ მთლიანად ჩვენი ქვეყნისთვის განსაკუთრებული პროექტი იქნება.
გამომდინარე იქედან, რომ ძალიან ფრთხილი სამუშაოა შესასრულებელი, პროექტი არის ვადებში ოდნავ განგრძობადი, მაგრამ ეს იმისათვის, რომ პარკი არ დაიკეტოს და არ მოხდეს უხეში ჩარევა ბუნებაში.
კონტრაქტორი ძალიან ფრთხილად მუშაობს და მე ძალიან მიხარია, რომ ჩვენ ქვეყანაში ესეთი პროექტები ხორციელდება.
ზოგადად, ინფრასტრუქტურის სამინისტროს სამცხე-ჯავახეთშიც უამრავი პროექტი აქვს განხორციელებული და ბევრიც პროცესშია, ისევე, როგორ ყველა რეგიონში, ყველა ქალაქში, სოფელსა თუ დაბაში,»- აღნიშნა ინფრასტრუქტუტის მინისტრმა, რევაზ სოხაძემ.
