წელს საქართველო უმნიშვნელოვანეს ისტორიულ თარიღს — ქვეყნის გაქრისტიანებიდან 1700 წლის იუბილეს აღნიშნავს. ეს მოვლენა ქართველი ხალხის სულიერი, ისტორიული და კულტურული იდენტობის ერთ-ერთი უმთავრესი ეტაპია, რომელიც კიდევ ერთხელ უსვამს ხაზს ქრისტიანობის განსაკუთრებულ როლს ჩვენი სახელმწიფოებრიობის განვითარებაში.
ეს არ არის მხოლოდ მშრალი ისტორიული თარიღი; ეს არის გზა, რომელმაც განსაზღვრა ქართველი ერის სულიერი სახე, კულტურა და თვითმყოფადობა. ღირსეულად გავლილი 1700 წელი გვახსენებს, რომ რწმენა, როდესაც ის ღრმა შინაგან გამოცდილებად იქცევა, აყალიბებს არა მხოლოდ ინდივიდს, არამედ მთელ ერს. ქრისტიანობამ გააერთიანა ქართველი ხალხი, შექმნა ძლიერი კულტურა და მრავალ განსაცდელს გადაარჩინა სამშობლო.
დღესაც, საუკუნეების შემდეგ, არსებობს ფუნდამენტური ღირებულებები, რომლებიც გვაერთიანებს:
- რწმენა
- ისტორია
- სამშობლოს სიყვარული
- საერთო ფასეულობები
სწორედ ეს ძალა აძლიერებდა საქართველოს წარსულში, აძლიერებს დღეს და იქნება ჩვენი მომავალი ერთიანობის მყარი საფუძველი.
შთამბეჭდავი ღონისძიება ახალდაბის საჯარო სკოლაში
ამ დიდებულ თარიღსა და ეროვნულ იდეას მიეძღვნა მასშტაბური ღონისძიება სახელწოდებით „ის, რაც გვაერთიანებს“, რომელიც 8 ივნისს ახალდაბის საჯარო სკოლაში გაიმართა.
ახალდაბის სკოლის სხვადასხვა კლასის მოსწავლეებმა დიდი პასუხისმგებლობითა და ენთუზიაზმით ისაუბრეს ქრისტიანობის როლსა და მნიშვნელობაზე ჩვენი ქვეყნის ცხოვრებაში — როგორც წარსულში, ისე აწმყოში. მონაწილეებმა მაყურებელს მრავალფეროვანი და ემოციური პროგრამა წარუდგინეს. საღამო გამდიდრებული იყო:
- შთამბეჭდავი თეატრალური წარმოდგენებით;
- ეროვნული და პატრიოტული შინაარსის სიმღერებით;
- საფირმო ქართული ცეკვებით.
ღონისძიებამ უდიდესი ინტერესი გამოიწვია და დამსწრე საზოგადოების მაღალი შეფასება დაიმსახურა.
ღონისძიების დღეს სკოლის ფოიეში მოეწყო ახალდაბის მედიაკაფე “ლუტრეზი”-ს თექის კლუბის მონაწილე, ახალდაბის საჯარო სკოლის მოსწავლეთა, თექის ნამუშევრების გამოფენა. სტუმრები აღფრთოვანებას ვერ მალავდნენ ახალგაზრდების ნამუშევრების დათვალიერებისას. დეკანოზ იოანე ხეცურიანს განსაკუთრებით მოეწონა ახალდაბის საჯარო სკოლის მე-5 კლასელის, მარიამ ბლიაძის ნამუშევარი “ჩვენ ვართ საქართველო”. პატარა მარიამმა კი უყოყმანოდ და დიდი სიამაყით უსახსოვრა მას თავისი ნამუშევარი.
საპატიო სტუმრები და თაობათა ერთობა
ღონისძიებას უამრავი საპატიო სტუმარი ესწრებოდა, მათ შორის ადგილობრივი თვითმმართველობის, საგანმანათლებლო სფეროსა და სასულიერო პირთა წარმომადგენლები. მოწვეულ სტუმრებს შორის იყვნენ:
- ხათუნა ხარაზიშვილი — ბორჯომის რესურსცენტრის ხელმძღვანელი (თავის გუნდთან ერთად);
- დეკანოზი ილია ესართია — ახალდაბის იოანე ნათლისმცემლის შობის სახელობის ტაძრის წინამძღვარი;
- დეკანოზი იოანე ხეცურიანი — წმინდა ილია მართლის სახელობის ტაძრის წინამძღვარი;
- დეკანოზი ალექსანდრე კურტანიძე — წმინდა თამარ მეფის სახელობის ტაძრის წინამძღვარი;
- ავთანდილ ცერცვაძე, გოჩა ჩადუნელი, მალხაზ ჩადუნელი და ზურა ბლიაძე — ახალდაბის გამგეობისა და ბორჯომის საკრებულოს წარმომადგენლები;
- მარინა ჩადუნელი — ახალდაბის საბავშვო ბაღის დირექტორი;
- ნატო (გულიზა) გუბელაძე — ინტერნეტგამოცემა “ბორჯომიnews”-ისა დამედიაკაფე „ლუტრეზის“ დირექტორი;
- ქეთევან სირაძე — ბორჯომის თოჯინების თეატრის დირექტორი;
- მაია ზედელაშვილი — ბორჯომის მესამე სკოლის მუსიკის პედაგოგი;
- ნანა გონგლაძე — ყვიბისის მესამე სკოლის პედაგოგი.
განსაკუთრებით აღსანიშნავია, რომ დარბაზში შეკრებილი იყო დაბის როგორც უმცროსი, ისე — უფროსი თაობა, რამაც კიდევ ერთხელ გაუსვა ხაზი იმ უწყვეტ კავშირსა და ერთიანობას, რასაც ეს დღესასწაული ჰქვია.
საღამოს დასასრულს ღონისძიების მონაწილეებს სიტყვით მიმართეს: ბორჯომის რესურსცენტრის ხელმძღვანელმა, ხათუნა ხარაზიშვილმა, დეკანოზებმა — იოანე ხეცურიანმა, ილია ესართიამ და ალექსანდრე კურტანიძემ. მათ მადლობა გადაუხადეს სკოლის ხელმძღვანელობას, ქალბატონ ეკა გოგალაძეს, პედაგოგებსა და მოსწავლეებს, ასეთი შესანიშნავი ღონისძიების ორგანიზებისთვის.
მოამზადა მარიკა ყაულაშვილმა
P.S. ინტერნეტგამოცემა “ბორჯომიnews” ულოცავს ახალდაბის საჯარო სკოლას ამ არაჩვეულებრივ და მაღალი დონის ღონისძიებას. დიდ წარმატებებს ვუსურვებთ სკოლის ხელმძღვანელობას, მოსწავლეებსა და მთელ პედაგოგიურ კოლექტივს თავიანთ საგანმანათლებლო და ეროვნულ მისიაში!
