ბორჯომის მუნიციპალიტეტში, კერძოდ, ახალდაბაში, მედიაკაფე «ლუტრეზი»- ში, 12 აგვისტოდან „ქალთა სამოქალაქო აქტივიზმის საზაფხულო სკოლა“ ამოქმედდება, რომელიც ხელს შეუწყობს მუნიციპალიტეტის რამდენიმე სოფელში ადგილობრივი ახალგაზრდა მოზარდი გოგონების გააქტიურებას, მათი ცნობიერების ამაღლებას ქალთა ლიდერობასა და ადგილობრივ დონეზე გადაწყვეტილების მიღების პროცესში ჩართულობაზე; რომ ახალგაზრდა გოგონებმა თავად შეძლონ თემის საჭიროებების კვლევა, ადგილობრივი თვითმმართველობის წინაშე არსებული პრობლემების დაყენება, აქტუალიზაცია და ადვოკატირება.
პროექტს ახორციელებს „სამოქალაქო საზოგადოებისა და მედიის განვითარების ინსტიტუტი“, ახალდაბის მედიაკაფესთან ერთად, „ფონდი ტასო“-ს ფინანსური მხარდაჭერით.
დაგეგმილი გვაქვს, წარმოვაჩინოთ, რა პრობლემები აქვთ ბორჯომის მაღალმთიან სოფლებში მცხოვრებ ახალგაზრდა გოგონებს და ქალბატონებს და შევიმუშაოთ რეკომენდაცია ადგილობრივი თვითმმართველობისთვის, კონკრეტულად, რა კუთხით უნდა გაღრმავდეს მუშაობა და თანამშრომლობა მათთან.
სკოლა-ბანაკის მონაწილეთა შესარჩევად მოხდება საინფორმაციო შეხვედრების ორგანიზება ბორჯომის მუნიციპალიტეტის სამ სოფელში (ახალდაბა, დვირი, ციხისჯვარი) მცხოვრები გოგონებისა და ახალგაზრდა ქალებისთვის. აქტიური ახალგაზრდების შერჩევის შემდგომ მათთვის ორჯერ გაიმართება ერთობლივი 4დღიანი ტრენინგი ახალდაბაში „ქალთა სამოქალაქო აქტივიზმის სკოლა“-ში.
ტრენინგების თემატიკა მრავალფეროვანი იქნება:
• ქალები და ლიდერობა, გადაწყვეტილების პროცესში ქალთა მონაწილეობის გაზრდის უზრუნველყოფა; სათემო პრობლემების იდენტიფიცირება და ადვოკატირება ქალთა პოლიტიკური და შრომითი უფლებები და ქალთა პოლიტიკური გაძლიერება.
• საქართველოს საარჩევნო სისტემის სიახლეები და გენდერული ასპექტები; როგორ გავხდეთ ინფორმირებული ამომრჩეველი.
• როგორ გავხდეთ აქტიური მოქალაქეები ანუ მოქალაქე ჟურნალისტები, სოციალური მედია და სამოქალაქო აქტივიზმი, როგორ ჩავერთოთ ადგილობრივ თვითმმართველობაში.
პირველი ერთობლივი ტრენინგის შემდეგ ახალგაზრდა აქტივისტი ქალები/გოგონები თავთავიანთ სოფლებში დაბრუნებისთანავე გახდებიან ჩვენი ბლოგერები.ისინი ორგანიზებას გაუწევენ თავიანთ სოფლებში მცირე ანკეტური გამოკითხვების/კვლევების ჩატარებას ქალთა საკითხებზე, მათ პრობლემებსა თუ საჭიროებებზე. ასევე მოახდენენ მინიმუმ ერთი(ან ორი) სათემო პრობლემის იდენტიფიკაციას, ვიზუალიზაციას და შემოგვთავაზებენ პრობლემის გადაჭრის მათ ხედვას. მომდევნო ტრენინგზე უკვე მოხდება მათ მიერ მომზადებული კვლევების ანალიზი, გამოკვეთილი სათემო პრობლემების გაცნობა და ადგილობრივ ხელისუფლებამდე მიტანის გზების განხილვა. თითოეულ თემში გამოკვეთილი პრობლემის ვიზუალიზაციისთვის მოხდება მათი ფოტოგრაფირება, შესაბამისი სტატიისა თუ ბლოგის მომზადება.
ეს სტატიები თუ ბლოგები გამოქვეყნდება ჩვენს ინტერნეტგამოცემაში www.borjominews.ge
პროექტის ფარგლებში გამოვაცხადებთ ასევე საუკეთესო ბლოგის/ვიდეობლოგის კონკურსს „ქალის ცხოვრება მთაში“ და კონკურსს შევაჯამებთ პროექტის ბოლოს, სადაც თითოეული სამიზნე სოფლიდან ორ ორ გამარჯვებულს გამოვავლენთ და დიპლომებითა და სამახსოვრო პრიზებით დავაჯილდოვებთ.
ტრენინგების დროს გაიმართება ასევე ქალთა აქტივიზმთან თუ ლიდერობასთან დაკავშირებული ფილმის ჩვენებები და დისკუსიები;
„ქალთა სამოქალაქო სკოლის“ მონაწილეებისათვის, გამოცდილების გაზიარების კუთხით, დაგეგმილია გასვლა ქუთაისში, შეხვედრა ადგილობრივ აქტივისტ გოგონებთან და სამოქალაქო თეატრის სპექტაკლზე დასწრება.
პროექტის დასასრულს ჩვენი „ქალთა სამოქალაქო აქტივიზმის სკოლის“ მიერ დატრენინგებულ ლიდერ გოგონებზე დაყრდნობით შევქმნით ერთიანი ქსელს, „ქალთა სამოქალაქო სერპანტინი (მიხვეულ-მოხვეული, დაკლაკნილი გზა მთაში)“. ამ ქალთა ქსელის მიერ შემუშავებულ რეკომენდაციებს წარვუდგენთ ადგილობრივი თვითმმართველობის ხელმძღვანელებს.
ამავე დროს, პროექტის წარმატებულ საქმიანობასთან დაკავშირებით მოვამზადებთ საგაზეთო ჩანართს ჩვენს გაზეთ „ბორჯომიnews”-ში.
აქვე აღვნიშნავთ, რომ ბორჯომის ადგილობრივი თვითმმართველობის ხელმძღვანელობა, ქალაქის მერი, ოთარ არბოლიშვილი, საკრებულოს თავმჯდომარე, დავით ზაალიშვილი, საკრებულოს წევრები, გენდერული საბჭოს, ქალთა ოთახის წარმომადგენლები და მერიის პრესსამსახურეის ხელმძღვანელობა ყოველთვის მხარს უჭერენ ახალდაბის მედიაკაფეში განხორციელებულ ახალგაზრდულ პროექტებს.
ბორჯომის მუნიციპალიტეტის სოფლებში კონკრეტული შეხვედრების ორგანიზებისა და პროექტთან დაკავშირებული ინფორმაციის გავრცელებაში აქტიური დახმარება გაგვიწიეს: ბორჯომის საკრებულოს წევრმა, ელზა კუჭუხიძემ, ქალთა ოთახის ხელმძღვანელმა, ნონა ლურსმანაშვილმა და ციხისჯვრის სკოლის დირექტორმა, ჯულიეტა მაისურაძემ.
სამომავლოდაც ადგილობრივ თვითმმართველობასთან თანამშრომლობით ვგეგმავთ სხვადასხვა აქტივობის განხორციელებას. უღრმესი მადლობა თითოეულ მათგანს.
ნატო გუბელაძე
პროექტის დირექტორი
«ეს პუბლიკაცია შექმნილია “ფონდი ტასოს“მხარდაჭერით. მის შინაარსზე სრულად პასუხისმგებელია ავტორი და ის შესაძლოა, არ ასახავდეს „ფონდი ტასოს“შეხედულებებს.”
