#women_reporters_academy
„რეპორტიორ ქალთა აკადემია“-მ ბორჯომში სამცხე-ჯავახეთის რეგიონის და თბილისიდან მოწვეული ჟურნალისტებისთვის ორდღიანი ტრენინგი გამართა თემაზე — „მრავალეთნიკურობა და მიგრაცია საქართველოდან“.
მანამდე კი ონლაინვებინარები გაიმართა, საერთაშორისო ექსპერტების ჩართულობით.
ბორჯომში, ფიზიკურ სივრცეში გამართული ტრენინგის ორივე დღე მრავალფეროვანი და საინტერესო იყო. პირველ დღეს მედიაში ქალთა გაშუქების საკითხის განხილვა მოეწყო.
ამ თემის სპიკერმა, ტელეკომპანია „ბორჯომის“ საინფორმაციო სამსახურის უფროსმა, ნინო ვართაპეტიანმა, ისაუბრა სამცხე-ჯავახეთში არსებულ სტერეოტიპებსა და ტრადიციებზე, ქალების შეზღუდულ უფლებებსა და მათზე ძალადობის ფორმებზე. ტრენინგის მონაწილეებმა განიხილეს კონკრეტული ქეისები, მათ შორის — მედიაში ქალების გაშუქების საკითხები და სპიკერისგან მოისმინეს რეკომენდაციები, თუ რა უნდა გაითვალისწინონ ხოლმე ჟურნალისტებმა, ამ თემებზე მუშაობისას.
ტრენინგის მონაწილეებს განსაკუთრებით საინტერესო ინფორმაცია მიაწოდა მიგრაციის საერთაშორისო ორგანიზაციის IOM წარმომადგენელმა, ნათია დიდებულიძემ, რომელმაც ქალთა მიგრაციის თემაზე ისაუბრა. წარმოადგინა მნიშვნელოვანი სტატისტიკური მონაცემები, თუ რომელ ქვეყანაში რამდენი მიგრანტია საქართველოდან, რა პირობებში უწევთ ცხოვრება და მათი ორგანიზაციიდან რა სერვისებით სარგებლობა შეუძლიათ საქართველოში დაბრუნებისას.
ასევე არანაკლებ მნიშვნელოვანი იყო ტრენინგის მეორე დღე, რომელიც ძირითადად ეთნიკური და რელიგიური უმცირესობების საკითხებზე საუბარს და მსჯელობას დაეთმო. თემის სპიკერი გახლდათ მედიასახლ „სამხრეთის კარიბჭე“-ს დირექტორი გულნარა კოხოძე, რომელმაც ინტერაქტიულ რეჟიმში წარმართა შეხვედრა და სამცხე-ჯავახეთში მცხოვრებ ეთნიკურ და რელიგიურ უმცირესობათა პრობლემებზე გაამახვილა ყურადღება.
ამავე დღეს კიდევ ერთხელ დაეთმო დრო მიგრაციის თემას და ამ შემთხვევაში — ამ საკითხის მედიაში გაშუქებას. ტელეკომპანია „ბორჯომის“ დირექტორის მოვალეობის შემსრულებელმა, ეკატერინე ნოზაძემ დეტალურად ისაუბრა თავის გამოცდილებაზე მიგრაციის საკითხების გაშუქებისას, თუ რა პრობლემებს წააწყდა ამ თემაზე სტატიის მომზადებისას, დაწყებული იქედან, რომ ქვეყნის არცერთ უწყებაში არ არსებობს მიგრანტების ზუსტი სტატისტიკა და დამთავრებული იმით, რომ სახელმწიფო პროგრამებით წასული მიგრანტებიც კი ხშირად უსაფრთხოდ არ არიან იმ ქვეყნებში, სადაც მოკლევადიანი სამუშაოსთვის მიდიან.
ტრენინგების დასასრულს, პროექტ „რეპორტიორ ქალთა აკადემიის“ დირექტორმა, გალინა პეტრიაშვილმა, ჟურნალისტებს დეტალური ინფორმაცია მიაწოდა იმის შესახებ, თუ როგორ უნდა ჩაერთონ იმ საერთაშორისო მედიაკონკურსში, რაც ამავე პროექტის ფარგლებშია გამოცხადებული და ითვალისწინებს სხვადასხვა მედიაფორმატში ჟურნალისტური მასალების მომზადებასა და გამოქვეყნებას ომში ან კრიზისულ სიტუაციებში მყოფი ქალებისა თუ მიგრაციის თემებზე.
კონკურსში მონაწილეობა შეუძლიათ ქვეყნის მასშტაბით, ნებისმიერი მედია საშუალების ქალ რეპორტიორებს. საკონკურსო ნამუშევრებს შეაფასებს საერთაშორისო ჟიური და გამოვლინდება 9 გამარჯვებული. მათ შორის, სამი საუკეთეო სტატიის ავტორი გაემგზავრება ბერლინში, სასწავლო ვიზიტით.
ტრენინგის მონაწილე ჟურნალისტებს სერტიფიკატები გადაეცათ.
აღსანიშნავია ისიც, რომ „რეპორტიორ ქალთა აკადემია“ ბორჯმის შემდეგ, ტრენინგებს გამართავს იმერეთსა და სამეგრელოში — საირმეში და ანაკლიაში.
პროექტს „რეპორტიორ ქალთა აკადემია“, საქართველოში ახორციელებს ჟურნალისტთა ასოციაცია „გენდერული მედია კავკასია“ და გერმანული ორგანიზაცია „ანალიზისა და პოლიტიკის დიალოგის ინსტიტუტი“ (IfAP). პროგრამას აფინანსებს გერმანიის საგარეო საქმეთა სამინისტრო.
ნატო გუბელაძე
