დაბა ახალდაბის მედიაკაფე ,,ლუტრეზის»-თან არსებული „გენდერმედიაცენტრის“ და „სამცხე-ჯავახეთის სათემო განვითარების ცენტრი“-ს ახალგაზრდული საბჭოს წევრები ბორჯომის მუნიციპალიტეტის მერს, ბატონ ოთარ არბოლიშვილს კაბინეტში ვესტუმრეთ და იმ საკითხებზე ვესაუბრეთ, რაც ბორჯომის მუნიციპალიტეტისა და მათ შორის — ახალდაბისთვის, ძალიან აქტუალურია. მერთან ძალიან გულწრფელი, საინტერესო და უშუალო საუბარი შედგა, რომელსაც მოკლე დიალოგის სახით გთავაზობთ.
— ბატონო ოთარ, ჩვენი საუბარი გასული წლის მოკლე შეფასებით დავიწყოთ: რა იყო ის მნიშვნელოვანი საკითხები და პრობლემები, რომელთა გადაჭრაც დაგეგმილი იყო და რამდენად შეძელით მათი მოგვარება?
-გასული წელი საკმაოდ დატვირთული იყო გამოწვევებით და სამუშაოებით. ვფიქრობ, რომ გამოწვევები სულ იქნება, რადგან როდესაც საქმის კეთების პროცესი იწყება, უფრო მეტი პრობლემები იჩენს ხოლმე თავს, როგორც საორგანიზაციო, ისე — ინფრასტრუქტურულ საკითხებში, თუმცა ამ გამოწვევებზე საპასუხოდ ჩვენ მუდამ მზად ვართ, მუდამ ვძლიერდიებით და ვემზადებით. გასულ წელს ბევრი ინფრასტრუქტურული პროექტი განხორციელდა, თუმცა, რა თქმა უნდა, ეს საკმარისი არ არის, ბევრი გამოწვევა ყოველდღიურად მოდის, მაგრამ ხდება თანხის გადანაწილება და ისეთი საკითხების არჩევა, რომელიც ყველაზე აუცილებელია მოსაგვარებლად. როგორც ყოველთვის, ისევ გამოწვევად რჩება წყლის პრობლემები, სოფლად მდებარე ჩიხების, გზების კეთილმოწყობა, დიდია აგრეთვე საყრდენი კედლების პრობლემები, რომელიც საკმაოდ მაღალბიუჯეტური პროექტია და მთლიანად ჯერ ვერ დავასრულეთ, თუმცა რაღაც ნაწილი მაინც გაკეთდა.
— დაახლოებით რა თანხა დაიხარჯა ამ ყველაფერში?
— ინფრასტრუქტურულ ნაწილში დაახლოებით 18 მილიონი ლარი დაიხარჯა. გარდა ამისა, დაახლოებით 3 მილიონი ლარი სოციალური პროექტების განხორციელებას მოხმარდა.
— რადგან ჩვენ ახალდაბელები ვართ, მეტად დავინტერესდებით ახალდაბასთან დაკავშირებული საკითხებით. რას გვეტყვით?
— მუნიციპალიტეტში 33 სოფელი და 3 დაბა გვაქვს, გასულ წელს ახალდაბა ცოტა დაგვეჩაგრა, რადგან იმ სოფლებზე უფრო მეტი ხარჯი გავწიეთ, ვინც წინა წლებში იყო დაჩაგრული. სამწუხაროდ, ყველა სოფელს ერთდროულად სრულყოფილად ვერ ვეხმარებით. წელს კი ახალდაბაში განვახორციელებთ საბავშო ბაღის რეაბილიტაციას, ერთ-ერთ უბანს, რომელსაც ძალიან მოუწესრიგებელი კანალიზაცია აქვს, ამ პრობლემას მოვუგვარებთ. გარდა ამისა, წელს აუცილებლად დავიწყებთ ახალდაბის სადგურთან მდებარე სკვერის რეაბილიტაციას, ჩიხებისა და განათებების ნაწილზეც აღმოიფხვრება პრობლემა… თითოეულ თემში იმდენი გამოწვევა და პრობლემებია, რომ რთულია ყველაფრის ერთად მოგვარება. ამიტომ გვინდა, რომ ყველას ცოტ-ცოტა შეხვდეს ბიუჯეტური თანხა.
ასევე ძალიან დიდი გამოწვევაა სოფლებში წყლის პრობლემები, თუმცა, ამ საკითხში ახალგაზრდების ჩართულობაც ძალიან მნიშვნელოვანია. თქვენ იცით, რომ სოფლებში მოსახლეობის დიდი ნაწილი, ბევრი თქვენი მეზობელი უდიერად ეპყრობა წყალს, არ უფრთხილდება მას და მუდმივად მოშვებული აქვს, რის გამოც ზოგიერთ უბანში საერთოდ არ აღწევს წყლის ნაკადი.
აი, მაგალითად მოგიყვანთ: ჩვენ რეაბილიტაცია ჩავუტარეთ სასმელი წყლის სათავე ნაგებობას სოფელ ტაძრისში, უშუალო კონტროლზე გვყავდა აყვანილი და 1 საათში შემოვიდა დაახლოებით100 ტონა წყალი. 24 საათში გვაქვს 2400 ტონა წყალი, გვყავს 300 მოსახლე, დღეში 24 საათის განმავლობაში 1 კომლზე მოდის 8 ტონა წყალი, თუმცა ნახევარი სოფელი მაინც უწყლოდაა. ასეა ბევრ სოფელში და მათ შორის ახალდაბაშიც. კარგი იქნება ამ საკითხში ახალგაზრდების ჩართულობა, რომ ვამხილოთ ის ხალხი, ვინც ასე ექცევა იმ უნიკალურ სიმდიდრეს, სასმელ წყალს და საერთოდ არ ანაღვლებს, სხვა თანასოფლელებს ექნებათ თუ არა წყალი..
— ბატონო ოთარ, გენდერული ბიუჯეტი თუ არსებობს ცალკე და დაახლოებით რა თანხაა წელს გამოყოფილი? –
— გენდერულ საკითხებზე , პასუხისმგებელია საკრებულოს გენდერული საბჭო, რომლის ხელმძღვანელიც თვითონ საკრებულოს თავმჯდომარე, ბატონი დავით ზაალიშვილია. გენდერულ საკითხებისთვის დაახლოებით 20 000 ლარამდეა ბიუჯეტში განსაზღვრული.
— იცით, როდესაც ჩიხების მოწესრიგებასა და ქუჩის განათებებზე ვსაუბრობთ, ეს საკითხიც გენდერულად მგრძნობიარე თემაა, თუნდაც იმიტომ,რომ ქალებისთვის და გოგონებისთვის განსაკუთრებით საშიშია ბნელ ჩიხებში მარტო სიარული, ვიდრე — მამაკაცებისთვის, ამიტომ გთხოვთ, რომ ეს გაითვალისწინოთ და იზრუნოთ ამ საკითხზე — ვეუბნებით ბატონ ოთარს და ისიც ღიმილით გვპასუხობს:
— კი, აუცილებლად…3 კილომეტრი გზაა დარჩენილი ახალდაბაში და ვიზრუნებთ ამაზე…
— ახალგაზრდებისთვის ან ახალგაზრდული პროექტებისთვის თუ არის თანხები ბიუჯეტში გათვალისწინებული?
— დიახ, რა თქმა უნდა, ძირითად ბიუჯეტში გამოყოფილია სხვადასხვა მიმართულებები და ღონისძიებები ახალგაზრდებისთვის. გვაქვს სხვადასხვა პროექტი ახალგაზრდების სტიმულირებისა თუ წახალისებისთვის, თუმცა, ამავე დროს დიდი სიამოვნებით მივიღებთ ნებისმიერი ახალგაზრდის თუ ახალგაზრდული ორგანიზაციის პროექტს და განვიხილავთ, გამოვძებნით ფორმებს კარგი ახალგაზრდული იდეის დასაფინანსებლად. მთავარია, ახალგაზრდებმა იაქტიურონ და ჩვენამდე მოიტანონ თავიანთი სურვილები.
— მადლობა, ბატონო ოთარ, საინტერესო საუბრისათვის! თქვენ ჩვენი მედიაკაფეს სტუმარიც ბრძანდებოდით გასულ წელს და ძალიან დიდი სტიმული მოგვეცით, რომ ახალგაზრდულ პროექტებზე ვიმუშაოთ და ვეცდებით, მუნიციპალიტეტის მხარდაჭერაც მოვიპოვოთ.
მარიამ ლომიძე, ქეთი ოყროშიძე
«სამცხე-ჯავახეთის სათემო განვითარების ცენტრი“-ს ახალგაზრდული საბჭოსა და ახალდაბის „გენდერმედიაცენტრის“ წევრები
