ახალდაბაში მედიაკაფე «ლუტრეზი»-ში გენდერმედიაცენტრის პრეზენტაცია გაიმართა

 3 ივნისს, ახალდაბაში, მედიაკაფე „ლუტრეზი“-ში, სამოქალაქო აქტივიზმის გენდერმედიაცენტრის პრეზენტაცია შედგა. პროექტს „ფონდი ტასოს“ მხარდაჭერით ახორციელებს სამოქალაქო საზოგადოებისა და მედიის განვითარების ინსტიტუტი (CSMDI), რომლის პარტნიორებიც არიან: მედიაკაფე „ლუტრეზი“ (სადაც გენდერმედიაცენტრის ოფისი იქნება განთავსებული), ინტერნეტგამოცემა www.borjominews.ge ; ასევე — „სამცხე-ჯავახეთის სათემო განვითარების ცენტრი“, „ქალი და არჩევანი“ და  „ამერიკული კუთხე ხაშურში“. აღსანიშნავია, რომ სწორედ ხაშურის ამერიკული კუთხის პროექტით, ახალდაბის არაფორმალური განათლების საზოგადოებრივი ცენტრისათვის მიღებულ ტექნიკურ აღჭურვილობას სამოქალაქო აქტივიზმის გენდერმედიაცენტრიც გამოიყენებს.

პრეზენტაცია გაიმართა მედიაკაფის ეზოში, ღია სივრცეში და მას ადგილობრივ ახალგაზრდებთან თუ სოფლის მცხოვრებლებთან ერთად, ესწრებოდნენ ახალდაბის გამგებელი, ავთანდილ ცერცვაძე და ბორჯომიდან და ხაშურიდან მოწვეული სტუმრები: ვიოლეტა ბალახაშვილი, ბორჯომის საკრებულოს მაჟორიტარი დეპუტატი, ნონა ლურსმანაშვილი, საკრებულოს „ქალთა ოთახი“-ს კოორდინატორი, მაკა მანჯავიძე — საკრებულოს იურიდიული კომისიის თავმჯდომარე, სოფო მუმლაძე — გენდერზე პასუხისმგებელი პირი ბორჯომის მერიაში, მარიამ სიმონიშვილი — პარლამენტის მაჟორიტარი დეპუტატის, ანტონ ობოლაშვილის ბორჯომის ბიუროს კოორდინატორი და ქეთი მეტრეველი — „ხაშურის ამერიკული კუთხის“ ხელმძღვანელი.

გენდერმედიაცენტრის დირექტორმა ნატო გუბელაძემ მოწვეულ სტუმრებს ცენტრის საქმიანობის მიზნები გააცნო და მადლობა გადაუხადა როგორც პროექტის დონორ ორგანიზაციას, ფონდ ტასოს, ასევე — ხაშურის ამერიკის კუთხეს, რომელმაც ტექნიკური აღჭურვილობა გადასცა ახალგაზრდებს. როგორც პრეზენტაციაზე აღინიშნა, „ახალდაბის სამოქალაქო აქტივიზმის გენდერმედიაცენტრმა“ უნდა შემოიკრიბოს ადგილობრივი ახალგაზრდები, მათ შორის —  მოზარდი გოგონები თუ ახალგაზრდა ქალები და სხვადასხვა აქტივობების განხორციელებით ხელი შეუწყოს მათ გააქტიურებას, ცნობიერების ამაღლებას ადგილობრივი თვითმმართველობის საკითხებზე, გენდერული პრობლემატიკის, ქალთა აქტივიზმის, უფლებების დაცვის, ლიდერობის და სათემო ინიციატივების პრაქტიკულად განხორციელების გზების შესახებ.

მედიაკაფე „ლუტრეზი“-ში ახალგაზრდებისთვის, გოგონებისა თუ ქალებისათვის მოეწყობა სპეციალური ტრენინგები, სადაც ისინი პროფესიონალი ტრენერებისგან მიიღებენ ინფორმაციას სხვადასხვა თემატიკაზე, რათა მომავალში თავად შეძლონ საზოგადოებრივ ცხოვრებაში აქტიურად მონაწილეობა, თემის საჭიროებების კვლევა, ადგილობრივი თვითმმართველობის წინაშე არსებული პრობლემების დაყენება, აქტუალიზაცია და ადვოკატირება.

პროექტის ფარგლებში დაგეგმილია სათემო ინიციატივების შედგენა და თანამშრომლობა ბორჯომის მუნიციპალიტეტის ხელმძღვანელ პირებთან, საკრებულოსთან არსებულ გენდერის საბჭოსთან, საკრებულოს ქალ დეპუტატებთან, ქალთა ოთახის წარმომადგენლებთან და მერიის გენდერსპეციალისტთან;

ახალგაზრდები გაეცნობიან მოქალაქეთა აქტიურობის, გამოხატვისა და ინფორმაციის თავისუფლების ზოგადი პრინციპებს და პრაქტიკაში გამოყენების მექანიზმებს. მოისმენენ ტრენინგს, როგორ გავხდეთ აქტიური მოქალაქეები ანუ მოქალაქე ჟურნალისტები, რა არის სოციალური მედია და სამოქალაქო აქტივიზმი; გაეცნობიან ახალი მედიის მუშაობის მეთოდებს, როგორ იქმნება მულტიმედიური და ინტერაქტიული ინტერნეტ-პროდუქტი.

გარდა ტრენინგებისა, პროექტი ითვალისწინებს წარმატებული ქალების მოწვევა გენდერმედიაცენტრში და მათი ისტორიების მოსმენას და გამოცდილების გაზიარებას;

ასევე, პროექტით დაგეგმილია შემეცნებითი ფილმების ჩვენება და დისკუსიები. მაგალითად, მედიაკაფეს ეზოში მოეწყობა გენდერულ პრობლემატიკასთან დაკავშირებული ფილმების ჩვენებები დიდ ეკრანზე;

პრეზენტაციის დღეს უკვე გაიმართა ცნობილი ქალი ფოტოგრაფის, ნათელა გრიგალაშვილის სლაიდშოუ და დისკუსია-დიალოგი: „სოფლად მცხოვრები ქალები/გოგონები — პრობლემები და პერსპექტივები“;

აღსანიშნავია ისიც, რომ პროექტის ფარგლებში ახალგაზრდები მოამზადებენ მულტიმედიასტატიებს, რომელიც განთავსდება პარტნიორ მედიასაშუალებაში www.borjominews.ge   როგორც პროექტის მიმდინარეობისას, ასევე — პროექტის დასრულების შემდგომაც.

და ბოლოს, რაც ყველაზე მნიშვნელოვანია — პროექტს გრძელვადიანი პერსპექტივა აქვს.  „სამოქალაქო აქტივიზმის გენდერმედიაცენტრი“ არსებობას გააგრძელებს პროექტის ვადის ამოწურვის შემდეგაც, რადგან ფატობრივად კვლავ იარსებებს  ამ ცენტრისთვის საჭირო სივრცე, ტექნიკური აღჭურვილობით. დატრენინგებული ახალგაზრდა ქალები და მოზარდი გოგონები კი შეძლებენ სხვა მეგობრებიც აიყოლიონ და მიღებული ცოდნა მათაც გაუზიარონ. მომავალში, ვფიქრობთ, რომ  გეოგრაფიული არეალიც გაიზრდება და პროექტში ჩაერთვებიან ახლომდებარე სოფლებში მცხოვრები ქალები თუ გოგონები.

მედიაკაფე „ლუტრეზი“-სა და გენდერმედიაცენტრის საკონტაქტო მონაცემებია:

მისამართი: ბორჯომის მუნიციპალიტეტი, დაბა ახალდაბა, ნ.ნიკოლაძის ქ.#19

გენდერმედიაცენტრის ხელმძღვანელი,

პროექტის დირექტორი — ნატო (გულიზა) გუბელაძე;  მობილ: 599107794;

პროექტის კოორდინატორი — იზა იანვარაშვილი, მობილ: 579117065

პროექტის ასისტენტი — თამუნა დემეტრაშვილი, მობილ: 551141110

ფბ-გვერდი: https://www.facebook.com/profile.php?id=100081253594628 

 ელფოსტა: csmdigeorgia@gmail.com