ყველა ადამიანის ცხოვრებაში დგება დღე, როდესაც რაღაც უნდა შეცვალო. ეს დღე ჩემს ცხოვრებაში შემოვიდა სასიამოვნო სიახლით, როდესაც მივიღე შემოთავაზება, ვყოფილიყავი მაჟორიტარი დეპუტატობის კანდიდატი ახალციხე, ბორჯომი, ადიგენი და ასპინძის ოლქში. ეს ჩემთვის ახალი გამოწვევაა, რომელსაც სიამოვნებით დავთანხმდი. ეს რეგიონი არის ჩემი მშობლიური მხარე, დავიბადე ადიგენის რაიონის სოფელ უდეში, გავიზარდე და განათლება მივიღე ამ რეგიონში, შესაბამისად ზედმიწევნით ვიცი ყველა ის საკითხი, რაც დღეს რეგიონის მოსახლეობას აწუხებს.
ასევე, კარგად ვიცი, თუ რა არის საჭირო ჩემი რეგიონის კეთილდღეობისთვის. მიუხედავად იმისა, რომ წლებია, დედაქალაქში ვცხოვრობ, ფიზიკური და სულიერი კავშირი რეგიონთან არ გამიწყვეტია. ამ რეგიონის მოსახლეობა და გარემო ჩემთვის კარგადაა ნაცნობი. ვთვლი, რომ მაქვს გამოცდილება და ძალა იმისა, რომ ჩემი რეგიონის მოსახლეობის პრობლემების მოგვარებას ხელი შევუწყო. ბიზნესში დაგროვებული მრავალწლიანი გამცდილება ამაში ძალიან დამეხმარება. ვფიქრობ, რომ ძალიან ბევრი სიკეთის გაკეთება შემიძლია ამ რეგიონისთვის. მე მზად ვარ, ვიყო ამ რეგიონის მოსახლეობის ღირსეული წარმომადგენელი ჩვენი ქვეყნის უმაღლეს საკანონმდებლო ორგანოში. ვიქნები ხიდი ხალხსა და ხელისუფლებას შორის. დეპუატატობის შემთხვევაში უფრო მეტი ბერკეტი და უფრო მეტი საშუალება მექნება, გაათმაგებულად დავიცვა ჩემი რეგიონის მოსახლეობის ინტერესები და სასიკეთო საქმეები ვაკეთო.
ჩვენს რეგიონს ტურიზმის განვითარების კუთხით ძალიან დიდი პოტენციალი აქვს, თვალნათლივ ვხედავ, ამ მიმართულებით რა უნდა გაკეთდეს და როგორ უნდა ჩამოყალიბდეს კიდევ უფრო მიმზიდველ ტურისტულ ზონად.
მადლობა „ქართული ოცნება — დემოკრატიული საქართველო“-ს იმისთვის, რომ ნდობა გამომიცხადეს და დამასახელეს ახალციხე, ბორჯომი, ადიგენი და ასპინძის ოლქის მაჟორიტარი დეპუტატობის კანდიდატად. ეს ძალიან დიდი პატივი და ამავდროულად დიდი პასუხისმგებლობაა ჩემთვის. მე ძალ-ღონეს არ დავიშურებ, რათა ეს ნდობა გავამართლო.
შემოვიარე ოთხივე მუნიციპალიტეტის 170-მდე სოფელი, შევისწავლე ყველა საკითხი, რაც სოფელებს აწუხებს, ძირითადად ყველა მუნიციპალიტეტში მოსაგვარებელი საკითხები ერთმანეთის მსგავსია. სოფლებში მოსაწესრიგებელია სისტემური ინფრასტრუქტურა, რათა სოფლის მოსახლეობამ შეძლოს საცხოვრებელი პირობების გაუმჯობესება. აღნიშნული საკითხების მოსაგვარებლად ხელისუფლებას მუშაობა დაწყებული აქვს და მომდევნო 4 წელი დაეთმობა ისეთი საკითხების მოგვრებას, როგორიცაა: გაზიფიცირება, გზების მოწესრიგება, წყლისა და ტელესაკომუნიკაციო საკითხების მოგვარება და სხვა.
ჩვენმა სახელმწიფომ ყველა ძირითადი მიმართულებით არსებითი პროგრესი განიცადა, რასაც სხვადასხვა სფეროში არსებული ვითარების კარდინალურ გაუმჯობესებასა და მოქალაქეების განწყობებთან ერთად ავტორიტეტული საერთაშორისო რეიტინგებიც ადასტურებს.
„ქართული ოცნების“ სახელისუფლებო გუნდი განვითარების სწორ გზას ადგას, აქვს მომავლის ხედვა, უნარი, რომ საკუთარ მოქალაქეზე, საკუთარ ქვეყანაზე იზრუნოს და ეტაპობრივად ყველა გამოწვევას გაუმკლავდეს.
ამისათვის საჭიროა, მოსახლეობამ სწორი არჩევანი გააკეთოს, რათა ხელისუფლების მიერ დაწყებული საქმეები ბოლომდე მივიდეს და მოსახლეობამ იგრძნოს სიკეთე და სარგებელი.
ისიც ფაქტია, რომ ჯერ კიდევ ბევრია გამოწვევა, რომელთა გადასჭრელად ერთობლივად უნდა ვიმუშაოთ. ჩემთვის ოთხივე მუნიციპალიტეტში მიმდინარე პროექტები და არსებული პრობლემები კარგად არის ცნობილი და მოსახლეობის მხარდაჭერით,უკვე საქართველოს პარლამენტიდან ვიზრუნებ ჩემთვის უსაყვარლეს მხარეზე. ჩემი უპირველესი ამოცანა იქნება, დავიცვა და გავატარო თითოეული მოსახლის ინტერესები, ვიყო მათი საამაყო წარმომადგენელი ჩვენი ქვეყნის უმაღელს საკანონმდებლო ორგანოში. ჩვენ ერთად გავაძლიერებთ ჩვენს მუნიციპალიტეტბს და ხელს შევუწყობთ ჩვენი მოსახლეობის დასაქმებას და კეთილდღეობას.
დარწმუნებული ვარ, ერთად დგომით, სამშობლოს სიყვარულით აუცილებლად გავიმარჯვებთ და მომდევნო წლების განმავლობაში უამრავ წარმატებას მივაღწევთ.
ერთად ჩვენი რეგიონის წარმატებისთვის! ერთად საქართველოს წარმატებისთვის!
