22 სექტემბერს ბორჯომის ცენტრალურ ისტორიულ პარკში წლის მთავარი ღონისძიება — „ბორჯომობა 2026“ გაიმართა.
დღესასწაული მრავალფეროვანი კულტურული, გასართობი და შემეცნებითი აქტივობებით მიმდინარეობდა.
ეს დღე განსაკუთრებულად სადღესასწაულო იყო “სამცხე-ჯავახეთის სათემო განვითარების ცენტრი”-სა და ახალდაბის ახალგაზრდულ მედიაკაფე “ლუტრეზი”-სთან არსებული თექის კლუბის მონაწილეებისთვის, ახალდაბის საჯარო სკოლის მოსწავლეებისთვის, რადგან პარკში შემოსულ სტუმრებს პირველები სწორედ ისინი ეგებებოდნენ, თექის ნაკეთობებისგან გაშლილი ტრადიციული ქართული სუფრით. ხოლო შემდეგ, სხვა სანახაობებთან ერთად, სტუმრები ასევე აღფრთოვანებულები ათვალიერებდნენ ამავე ახალგაზრდების შექმნილ თექის ნაკეთობების ულამაზეს გამოფენას.
ჩვენს “თექის სუფრასთან” დიდი პატივისცემით ვუმასპინძლეთ როგორც რიგით ბორჯომელებს, ისე ქალაქის ხელმძღვანელებსა და სტუმრებს: საქართველოს განათლების მინისტრის მოადგილეს, თამარ მახარაშვილს, სამცხე-ჯავახეთის მხარეში სახელმწიფო რწმუნებულს იოსებ ალიბეგაშვილს, ახალციხის, ადიგენის, ბორჯომისა და ასპინძის დელეგატს პარლამენტში, ანტონ ობოლაშვილს, ბორჯომის მუნიციპალიტეტის მერს მამუკა გელაშვილს, საკრებულოს თავმჯდომარე გიორგი ფერაძეს.
აქვე მადლიერებით აღვნიშნავთ, რომ ბორჯომობის დღესასწაულზე ამ დიდებული სანახაობის შექმნა ახალდაბის თექის კლუბმა ბორჯომის მერიის და ადგილობრივი თვითმმართველობის მხარდაჭერილი პროექტების ფარგლებში შეძლო.
“ბორჯომობა 2026” დატვირთული იყო სხვადასხვა სანახაობრივი ღონისძიებებით: დღის განმავლობაში მოეწყო ქართული საკარნავალო თეატრალიზებული მსვლელობა მსახიობების, ფაეტონისა და მუსიკოსების მონაწილეობით, გაცოცხლდა ინსტალაციები და წარმოდგენილი იყო ოთხი „ცოცხალი ქანდაკება“. პატარებისთვის იფუნქციონირა შემოქმედებითმა საბავშვო სივრცემ. ასევე გაიმართა ადგილობრივი მხატვრებისა და მეწარმეების ნამუშევრების გამოფენა-გაყიდვა. პარკის ტერიტორიაზე მოეწყო ფოტოკუთხეები, კვებისა და სტუმართა დასასვენებელი სივრცეები.
მუნიციპალიტეტის ხელმძღვანელმა პირებმა მოსულ სტუმრებს „ბორჯომობა 2026“ მიულოცეს, საპატიო ბორჯომელები აირჩიეს და დააჯილდოვეს.
აი, ისინიც:
თამარ მახარაშვილი ქალაქ ბორჯომში დაიბადა და გაიზარდა. დღეს იგი საქართველოს განათლებისა და მეცნიერების მინისტრის მოადგილეა და წლებია, ქვეყნის განათლების სისტემის სტრატეგიულ მიმართულებებსა და ზოგადი განათლების რეფორმას უდგას სათავეში. მიუხედავად მასშტაბური სახელმწიფოებრივი საქმიანობისა, იგი არასდროს ივიწყებს მშობლიურ ქალაქს, მუდმივად ზრუნავს რეგიონის საგანმანათლებლო საჭიროებებზე და აქტიურად თანამშრომლობს ადგილობრივ პედაგოგებთან.
მაკა ბლიაძე მწერალია, რომელმაც არაერთი ლიტერატურული ჯილდო მოუტანა მშობლიურ კუთხეს. იგი ხელმძღვანელობს ბორჯომის რუსთაველის საზოგადოებას და განსაკუთრებული წვლილი აქვს შეტანილი ქართულ საბავშვო პოეზიაში, რისთვისაც მიღებული აქვს შიო მღვიმელისა და მიხეილ მრევლიშვილის სახელობის პრემიები. ის ასევე ფლობს „წლის პოეტის“ ნომინაციასა და მწერალთა კავშირის პრესტიჟულ ჯილდოს — „ქართულ ენდალმას“.
ჯამბულ ღონღაძე სოფელ კორტანეთში დაბადებული საამაყო სპორტსმენია. ჯერ კიდევ ახალგაზრდობაში მან ბადროს სტყორცნაში საქართველოსა და ამიერკავკასიის ჩემპიონის ტიტული მოიპოვა. წარმატებული სპორტული კარიერის შემდეგ, 1970 წლიდან, იგი არაერთ წამყვან თანამდებობაზე მუშაობდა და უკვე ნახევარ საუკუნეზე მეტია, თავისი საქმიანობით ერთგულად ემსახურება ბორჯომის მუნიციპალიტეტს.
დაჯილდოების შემდეგ აუდიტორიის წინაშე ადგილობრივი ცეკვისა და სიმღერის ანსამბლები წარდგნენ, შემდეგ კი ქართული ესტრადის ვარსკვლავების მონაწილეობით გრანდიოზული გალა-კონცერტი გაიმართა, რომელიც მსახიობ კახა მიქიაშვილს მიჰყავდა. მსმენელის წინაშე წარდგნენ: აჩიკო ბერიძე, დათო არჩვაძე, აჩიკო ცანკაშვილი, ზუკა ხუციშვილი, გია ნიკოლაძე, გელა დონაძე და ანუკი ცქვიტინიძე, ტრიო „სამანი“, სალომე ბაკურაძე, სოფო პაპუაშვილი და გიგა პაპასკირი.
„ბორჯომობა 2026“ გრანდიოზული ფეიერვერკით დასრულდა.
ნატო გუბელაძე
