ფონდიტასო #TasoFoundation
სამოქალაქო აქტივიზმის სკოლის მონაწილე ახალგაზრდები ბორჯომიდან, „ფონდი ტასო“-ს პროექტის ფარგლებში ქუთაისს ეწვივნენ. აქ ისინი შეხვდნენ ადგილობრივ ახალგაზრდა სამოქალაქო აქტივისტებს, რომელთა შორის სხვადასხვა პროფესიის ადამიანები, ძირითადად ჟურნალისტები, არიან.
მათი განსაკუთრებულობა იმაშია, რომ ერთი წლის წინ გადაწყვიტეს, თავიანთი სათქმელი სამოქალაქო სცენიდან ეთქვათ და ქუთაისში „სამოქალაქო თეატრი“ დაარსეს.
თეატრის შექმნის იდეის ავტორი მრავალმხრივ ნიჭიერი ადამიანი, ქუთაისში კარგად ცნობილი პიროვნება ზეკო ხაჩიძე გახლავთ. როგორც თვითონ ამბობს, მას ეს იდეა ჯერ კიდე 2019 წლს გაუჩნდა, როცა მესხიშვილის თეატრში მუშაობდა და რეჟისორ რეზო ქაროსანიძეს გაუზიარა… დღეს ზეკოს ამბობს, რომ მისი მიზანია, სამოქალაქო თეატრმა ისეთი თემები წამოწიოს, რომელსაც კლასიკური თეატრი გვერდს უვლის, თან — პათეტიკის გარეშე.
თეატრალური დასის წევრებმა ბორჯომიდან სტუმრად ჩასულ ახალგაზრდა აქტივისტებს უამბეს, თუ როგორ და როდის გაჩნდა სამოქალაქო თეატრის დაარსების იდეა. როგორ, ყოველგვარი დაფინანსების გარეშე, ენთუზიაზმითა და კეთილი ადამიანების მხარდაჭერით ქმნიან სამოქალაქო თეატრის ისტორიას. მათი ნავსაყუდელი პირველი დღეებიდანვე სასტუმრო „არგო“-შია და ეს მისი მენეჯერის, ნათია კახიანის სოციალური პასუხისმგებლობის დამსახურებაა.
სამოქალაქო თეატრის პირველი წარმატებული განაცხადი ქუთაისური საზოგადოების წინაშე გასული წლის ოქტომბერში შედგა. სასტუმრო „არგო“-ს ფოიეში სამოქალაქო თეატრმა მაყურებელს წინაშე წარმოადგინა პირველი პერფომანსი, ახალგაზრდა საბა კლდიაშვილის ისტორია, რაც ებრაელების დევნას უკავშირდება. შემდეგ იყო სპექტაკლი „ავანტურისტები“, რაც „თეატრალური იმერეთი“-ს ფესტივალის ფარგლებში მესხიშვილის თეატრის სცენაზე ითამაშეს და მააყურებლის განსაკუთრებული ოვაციები დაიმსახურეს.
ბორჯომელი ახალგაზრდები დასწრნენ „სამოქალაქო თეატრის“ მომავალი სპექტაკლის რეპეტიციას, რომელმაც დიდი ემოციები მოიტანა მათში, უყურეს ნაწყვეტებს წინა სპექტაკლიდან ,,ავანტიურისტები“ და იქვე გაჩნდა სურვილი, რომ კარგი იქნება, თუ ქუთაისის სამოქალაქო თეატრი ბორჯომს ეწვევა და ბორჯომელი აუდიტორიისთვისაც წარმოადგენს ამ არაჩვეულებრივ სპექტაკლს. სამომავლო შეხვედრის და მეგობრობის გზებიც დაისახა.
ბორჯომელმა ახალგაზრდებმა ქუთაისში სტუმრობისას ასევე მოინახულეს ქალაქის ის მნიშვნელოვანი ადგილები, რომლის გარეშეც შეუძლებელია იგრძნო ამ ქალაქის ხიბლი, სითბო და სიყვარული. მეგზურობა კი სამოქალაქო თეატრის მსახიობმა და ჟურნალისტმა, ხვიჩა ვაშაყმაძემ გაუწიათ.
მოილოცეს უქიმერიონის გორაზე არსებული ბაგრატის ტაძარი, მერე ესტუმრნენ მეფეთუბანს და ოქროს ჩარდახს, იქვე, კლასიკურ გიმნაზიასთან ხმამაღლა წაიკითხეს იმ დიდებული ქართველების გვარ-სახელი, რომლებიც ქუთაისში სწავლობდნენ და რომელთა სიაც ამ გიმნაზიის კედლებს ამშვენებს, ესტუმრნენ მე-3 საჯარო სკოლას, როგორც ქალთა ყოფილ გიმნაზიას და „ხელი ჩამოართვეს“ იქვე, ბუნებრივად მდგომ „ქუთაისელი გიმნაზისტკას“ სკულპტურას, მოინახულეს ქალაქის ძველი უბნები,მათ შორის, კათოლიკური უბანი, ეწვივნენ ზაქარია ფალიაშვილის სახლ-მუზეუმს, აღფრთოვანდნენ ახალშექმნილი რეზო გაბრიაძის სტენსილით, მიესალმნენ გზად შემხვედრ „პაოლოსა და ტიციანს“, მოეფერენ და ფოტოები გადაიღეს „პიკასოს ბიჭთან“, იგრძნეს თეთრი ქვების სიდიადე, გაისეირნეს თეთრ ხიდზე და თან წაუკითხავი არ დაუტოვებიათ იმ დიდებული პოეტების ლექსები, რაც ქუთაისის სიმბოლოდ ქცეულ ამ ხიდზეა ამოტვიფრული.
დღის ბოლოს ბორჯომელი ახალგაზრდა აქტივისტები დაესწრნენ ქუთაისის ქალთა კლუბის შემაჯამებელ ღონისძიებას, რომელიც აერთიანებს ადგილობრივ წარმატებულ, პროფესიონალ ქალებს.
ქუთაისიდან ქუთაისური გემრიელობების გარეშე ხომ ვერ დაბრუნდებოდნენ, ჰოდა, ამ მხრივ ერთ-ერთი საუკეთესო რესტორანი ,,გალა“-ც დააგემოვნეს…
ნატო გუბელაძე
