რას ფიქრობენ და რა სურთ სოფლად მცხოვრებ ქალებს…

ფონდიტასო #TasoFoundation

გოგონათა სამოქალაქო აქტივიზმის სკოლის მონაწილე ახალგაზრდებმა, რომლებმაც ახალდაბის მედიაკაფე „ლუტრეზი“-ში ფონდი „ტასო“-ს ფინანსური მხარდაჭერით გაიარეს ტრენინგები  გენდერის, ადგილობრივ თვითმმართველობაში ჩართულობისა თუ სათემო პრობლემების ადვოკატირების კუთხით, შემდეგ თავიანთ სოფლებში: დვირში, ქვაბისხევში, ციხისჯვარში, საკირესა და ახალდაბაში ჩაატარეს მცირე კვლევა, ანკეტური გამოკითხვები ამ საკითხებზე.

გამოკითხვის მიზანი იყო იმის წარმოჩენა, თუ რა პრობლემები აქვთ ბორჯომის მაღალმთიან სოფლებში მცხოვრებ ქალებს, რას თვლიან ისინი თავიანთ თემებში ყველაზე მნიშვნელოვან პრობლემად. ამ გამოკითხვის ანალიზის საფუძველზე კი სამოქალაქო აქტივიზმის სკოლის მონაწილეები შეიმუშავებენ რეკომენდაციას ბორჯომის ადგილობრივი თვითმმართველობისთვის, რომ მათ უფრო მეტი დრო დაუთმონ  სოფლებში პრობლემების მოგვარებას, განსაკუთრებით — გენდერულ ჭრილში.

სულ გამოიკითხა 70  რესპოდენტი, მათ შორის 37 ქალი და 33 კაცი. აქედან 37-ს ჰქონდა  საშუალო განათლება, 10-ს — ტექნიკური და 23-ს — უმაღლესი განათლება.  გამოკითხულთა  შორის 14 იყო 18- დან 30 წლამდე, 27 იყო 30-დან 60 წლამდე და 30 იყო 60-ის ზევით ადამიანები.

რესპოდენტებმა კითხვებზეასეთი პასუხები გასცეს:

მიგაჩნიათ თუ არა, რომ ქალი და მამაკაცი თანასწორია და ერთნაირი უფლებები აქვთ ოჯახში ? — გამოკითხული  37 ქალიდან დადებითად პასუხობს 26,  ხოლო  11 უარყოფითად.  გამოკითხული 33 მამაკაციდან დადებითად პასუხობს 24,  ხოლო  9 —  უარყოფითად.

ოჯახში შვილების აღზრდა ვისი ვალდებულებაა? — გამოკითხული 37  ქალიდან 29  ფიქრობს, რომ ორივე მშობელი ვალდებულია შვილის აღზრდაში ჩაერთოს,  ხოლო  8 ფიქრობს, რომ ეს მხოლოდ დედის საქმეა. 

გამოკითხული 33 მამაკაციდან 21 ფიქრობს, რომ ორივე მშობლის ვალდებულებაა,  12  კი მიიჩნევს, რომ ეს დედის საქმეა.

გსმენიათ თუ არა ოჯახური ძალადობის შესახებ და შესწრებიხართ თუ არა მსგავსს ფაქტს? — 16-მა რესპონდენტმა აღნიშნა, რომ არ სმენია, 28 რესპონდენტმა  დადებითად გასცა პასუხი, ხოლო 26-მა აღნიშნა, რომ სმენია და ფაქტს შესწრებია კიდეც.

ოჯახური ძალადობის შემთხვევეში  თუ იცით ვის უნდა მიმართოთ? —გამოკითხულებიდან 47-მა აღნიშნა, რომ ასეთ შემთხვევაში ურეკავს 112-ს,                       23 კი ფიქრობს, რომ მ სგავსი შემთხვევები ხშირია და  ოჯახის წევრებმა უნდა მოაგვარონ.

უნდა იყოს თუ არა ქალი დასაქმებული? — ამ კითხვაზეგამოკითხული 37  ქალიდან 26  ფიქრობს, რომ კი, აუცილებელია,  5  ფიქრობს, რომ ქალის საქმე ოჯახის მოვლაა.  ხოლო 6-ს მიაჩნია  რომ თუ ოჯახში დედამთილია, რომელიც ბავშვების აღზრდასა და საოჯახო საქმეებში მიეხმარება ქალს, ამ შემთხვევაში შეიძლება,  ქალი დასაქმებული  იყოს.  

    გამოკითხული 33  მამაკაციდან  23   ფიქრობს, რომ კი, აუცილებელია, ქალი დასაქმებული იყოს,  4  ფიქრობს, რომ ქალის საქმე ოჯახის მოვლაა.  ხოლო 6-ს მიაჩნია  რომ თუ ოჯახში დედამთილია, რომელიც ბავშვების აღზრდასა და საოჯახო საქმეებში მიეხმარება ქალს, ამ შემთხვევაში შეიძლება,  ქალი დასაქმებული  იყოს.      

გსმენიათ თუ არა სოფელში/დაბაში გამგეობის მიერ ჩატარებული საერთო კრების შესახებ და თუ მიგიღიათ მასში მონაწილეობა?  — 26-მა აღნიშნა, რომ სმენია ამის შესახებ, თუმცა არასოდეს მიუღია მონაწილეობა. 34-მა აღნიშნა,რომ მონაწილეობაც კი მიუღია, ხოლო  10-მა თქვა,რომ მსგავსი შეხვედრის შესახებ არასოდეს გაუგია.

დასწრებიხართ თუ არა ბორჯომის მუნიციპალიტეტის საკრებულოს სხდომებს, სადაც თქვენი სოფლის/დაბის პროგრამის დაფინანსების საკითხები იხილებოდა? — 21-მა აღნიშნა, რომ ყოველთვის ესწრება სოფლის შეკრებებს,   22 ფიქრობს, რომ მათ აზრს მაინც არ გაითვალისწინებენ, ხოლო 27-მა აღნიშნა, რომ მხოლოდ ერთხელ დაესწრო.

მიგიღიათ თუ არა აჩევნებში მონაწილეობა  და თვლით თუ არა თქვენი ერთი ხმა მნიშვნელოვანია? — 58-მა აღნიშნა, რომ ყოველთვის იღებს არჩევნებში მონაწილეობას, ხოლო  12 მიიჩნევს, რომ არჩევნებზე წასვლას აზრი არ აქვს, რადგან ყველაფერი წინასწარაა გადაწყვეტილი.

მიგაჩნიათ თუ არა რომ არჩევით ორგანოებში  გენდერული ბალანსი  უნდა იქნეს დაცული  და კვოტირება აუცილებელია? — ამ საკითხზე28 რესპონდენტი ფიქრობს, რომ აუცილებელია კვოტირება, 18 ფიქრობს, რომ ქალებს მსგავსი საქმეებისთვის არ სცალიათ, ხოლო 24 ფიქრობს, რომ არაა აუცილებელი კვოტირება, ვისაც უნდა, ისედაც მოახერხებს ამას.

თქვენ, როგორც სოფლად მცხოვრები ქალი, რა პრობლემას აწყდებით? — ამ კითხვაზე37 გამოკითხული ქალიდან 22-მა  აღნიშნა, რომ არ არის სოფელში ქალისთვის სამსახური, მხოლოდ საოჯახო საქმეებით არიან  დაკავებული, ხოლო 15-მა აღნიშნა, რომ მის დასახლებაში არაა ისეთი სივრცეები, სადაც ქალები დაისვენებენ და განიტვირთებიან.

 

რა მიგაჩნიათ თქვენი სოფლის/დაბის მთავარ პრობლემად, რა საკითხის გადაწყვეტას ისურვებდით? — ამ შეკითხვის პასუხად  გამოიკვეთა რამდენიმე პრობლემა:

• ინტერნეტისა და ბუნებრივი გაზის არარსებობა;
• სარეკრეაციო ზონების არარსებობა;
• მოუწესრიგებელი გზები, კანალიზაციის და წყლის საკითხის მოუგვარებლობა;
• აფთიაქის და ქსელური მაღაზიის არარსებობა;
• სარწყავი არხების არარსებობა;
• გოგირდოვანი აბანოების რეაბილიტაცია;
• ნაგვის ურნების არასაკმარისი რაოდენობა, რის გამოც შორს უწევთ ნარჩენების გაზიდვა;
• მდინარის მიმდებარედ ჯებირების არარსებობა, რის გამოც მოსახლეობა და მათი ბაღები ზარალდება;
• ბავშვებისთვის და ახალგაზრედებისთვის გასართობი სივრცეების არარსებობა;
• სოფლად მცხოვრები ადამიანების ადგილზე დასაქმება, რადგან არ დაიცალოს სოფელი;
• სკოლის შემოღობვა;
• სკოლის მიმდებარე ხიდისთვის მოაჯირების გაკეთება;
•  საბავშვო ბაღის არარსებობა;
•  შიდა გზების მოასფალტება.

             

მოამზადა მარიკა ყაულაშვილმა