ახალდაბის მედიაკაფე ,,ლუტრეზი“-ში, სადაც „ფონდი ტასო“-ს მიერ დაფინანსებული პროექტის ფარგლებში „სამოქალაქო აქტივიზმის გენდერმედიაცენტრი“ ფუნქციონირებს, კიდევ ერთი სამდღიანი ტრენინგი გაიმართა. დედაქალაქიდან მოწვეულმა ტრენერმა, პროფესორმა ნატო ქათამაძემ ახალგაზრდებს გენდერის, ლიდერობის და სამოქალაქო აქტივიზმის შესახებ საინტერესო პრეზენტაციები და აქტივობები შესთავაზა.
გენდერული როლები და გენდერული სტერეოტიპები, ფემინიზმი/ანტიფემინიზმი/თანასწორობის ფემინიზმი, ფემინისტი კაცები, გამოჩენილ ქართველ ქალთა ისტორიები, ქალები და ლიდერობა, ქალთა მიმართ ძალადობის ფორმები — ეს იმ თემების არასრული ჩამონათვალია, რომლებიც შეხვედრებზე განიხილეს.
ქალბატონი ნატოს შედგენილ პრეტესტში მოცემულ კითხვებზე მონაწილეთა პასუხები კი იყო არაერთგვაროვანი. მათ გაიგეს — ,,მამაკაცები არ ტირიან“ — შეხედულება წარმოდგენილია სქესით თუ გენდერით?! ,,ქალი აჩენს ბავშვს“ — განპირობებულია გენდერით თუ სქესით?!
სემინარზე მნიშვნელოვანი დრო დაეთმო ფემინიზმის თემის განხილვას. მაინც, რატომ გვეშინია ფემინიზმის ასე? რა არის ფემინიზმის ცნებაში ისეთი, რაც ზოგიერთი ქალის აღშფოთებასაც კი იწვევს?როგორ დავანახოთ ჩვენს მშობლებს, ქმრებს, ცოლებს, მეგობრებს, ნათესავებს, მეზობლებს, კოლეგებს, შვილებს, რომ ფემინიზმი არ არის კაცების სიძულვილი და დევნა?
ტრენერმა ძალიან მარტივად და ლოგიკურად ახსნა ეს საკითხი, თავად ახალგაზრდების მონაწილეობით. მან მხოლოდ რამდენიმე კითხვა დაუსვა მსმენელებს და აღმოჩნდა, რომ ტრენინგის მონაწილე ყველა ახალგაზრდა ფემინისტი ყოფილა.
ანუ
თუ ფიქრობ, რომ
- ქალს და მამაკაცს თანაბრად, თავისუფლად უნდა შეეძლოს აზრის გამოთქმა ნებისმიერ თემაზე;
- დაუშვებელია ადამიანების ჩაგვრა, მითუმეტეს, გენდერული ნიშნით;
- გოგოც და ბიჭიც — ერთნაირად იმსახურებენ საუკეთესო განათლებას;
- ადამიანებს თავისუფლად უნდა შეეძლოთ პროფესიის არჩევა, განურჩევლად სქესისა;
- საქმეს ქალი ისეთივე წარმატებით ასრულებს, როგორც შენი საპირისპირო სქესის კოლეგა მამაკაცი
- ქალების და კაცების ანაზღაურება ერთი და იგივე სამუშაოსთვის თანაბარი უნდა იყოს;
- ქალებს და კაცებს შეუძლიათ ერთნაირად წარმატებით მიიღონ გადაწყვეტილებები, მათ შორის — პოლიტიკაში.
თუ ყველ პოსტულატს ეთანხმები, მაშინ ნუ იტყვი, რომ ფემინისტი არ ხარ!
იმისათვის, რომ ვიყოთ ფემინისტები, საკმარისია, ვაღიაროთ,რომ
- ჯერ კიდევ არ არის მიღწეული თანასწორობა…
- მამაკაცების არსებული უპირატესობა არა ბუნებით ნაბოძები, არამედ სოციალური მიზეზებით არის განპირობებული…
- არსებული უთანასწორობის შეცვლა შესაძლებელია.
ტრენინგზე შედგა მოკლემეტრაჟიანი ფილმის ჩვენება გამოჩენილ ქალთა ისტორიებზე, ასევე- ოჯახური ძალადობის თემაზე. დღის ბოლო ტრადიციულად დისკუსიებსა და შეჯამებებს ეთმობოდა.
მონაწილეებს გადაეცათ კითხვარები, რომელიც მოიცავს დაბაში გამოკითხვის ჩატარებას, სადაც უნდა გაეცეს შემდეგ კითხვებს პასუხი — გსმენიათ თუ არა ოჯახში ძალადობის ფაქტებთან დაკავშირებით? ძალადობის რა ფორმებია საზოგადოებაში გავრცელებული? (ფიზიკური, ფსიქოლოგიური), ექცევა თუ არა ყურადღება თანამდებობაზე დანიშვნის დროს სქესს? უნდა იყვნენ თუ არა ქალები პოლიტიკაში? აღნიშნული კითხვარის განხილვა მოხდება სამომავლოდ დაგეგმილ ტრენინგზე.
გვანცა ჩადუნელი (მოსწავლე, ტრენინგის მონაწილე):
- გენდერული თანასწორობა დღესაც მტკივნეული თემაა გარკვეულ საზოგადოებაში და ხალხის ინფორმირება აღნიშნული საკითხების შესახებ, ჩემი აზრით, ძალიან მნიშვნელოვანია. საზოგადოებამ უფრო მეტი უნდა გაიგოს ამ თემებზე. მე პირადად, აქ ტრენინგებით ძალიან ბევრი რამ გავიგე და გავიაზრე ამ საკითხების მნიშვნელობა.
ნიკა კაპანაძე (მოსწავლე, ტრენინგის მონაწილე):
- ტრენინგებზე გავიღრმავე ჩემი ცოდნა გენდერისა და სქესის შესახებ. მეტი გამოცდილება მივიღე, გუნდური მუშაობისას ყოველთვის სხვადასხვა აზრი იკვეთება,ხოლმე. ვეთანხმები, რომ ქალბატონებთან ერთად, მამაკაცებმაც უნდა გაიზიარონ ყველა ვალდებულება.
იზა იანვარაშვილი
