6-7 სექტემბერს ბორჯომის ისტორიულ პარკში გაიმართა მასშტაბური გასტრონომიული ფესტივალი „Gemo Fest 2025“
ღონისძიება ტურიზმის ეროვნული ადმინისტრაციის ორგანიზებით, სამცხე-ჯავახეთის სახელმწიფო რწმუნებულის ადმინისტრაციისა და ბორჯომის მუნიციპალიტეტის მერის მხარდაჭერით ბორჯომის ცენტრალურ პარკში ორი დღის განმავლობაში მიმდინარეობდა.
ფესტივალმა არა მხოლოდ უამრავ სტუმარს მოუყარა თავი, არამედ ახალი სიცოცხლე შემატა სამცხე-ჯავახეთის რეგიონს:
ადგილობრივი პროდუქციის გამოფენებმა და დეგუსტაციებმა წარმოაჩინა, თუ რამდენად მდიდარი და მრავალფეროვანია ჩვენი რეგიონის სამზარეულო;
გასტრონომიულ ფესტივალში მონაწილეობა 15-მდე ადგილობრივმა მზარეულმა მიიღო. წარმოდგენილი იყო ტრადიციული, იშვიათი და ნაკლებად ცნობილი კერძები.
კონცერტებმა და თეატრალურმა წარმოდგენებმა ფესტივალს კულტურული შინაარსი შესძინა;
ტურისტული და გასართობი აქტივობებით კი ბორჯომმა და რეგიონმა კიდევ ერთხელ დაამტკიცა, რომ შეუძლია საქართველოს ერთ-ერთ მთავარ ტურისტულ ლოკაციად ჩამოყალიბდეს.
ფესტივალს, ადგილობრივ მოსახლეობასთან და საქართველოს სხვადასხვა რეგიონიდან ჩამოსულ საზოგადოებასთან ერთად, ხელისუფლების წარმომადგენლები სტუმრობდნენ: პარლამენტარი, «ქართული ოცნების» დელეგატი სამცხე-ჯავახეთში» ანტონ ობოლაშვილი, სამცხე-ჯავახეთის სახელმწიფო რწმუნებული ზაალ გელაშვილი და ბორჯომის მერობის კანდიდატი «ქართული ოცნები»-დან მამუკა გელაშვილი.რწმუნებულის მოადგილე სერგი მუშკუდიანი, ბორჯომის მერის მოადგილე გიორგი ტაბატაძე და ადგილობრივი ხელისუფლების წარმომადგენლები ესწრებოდნენ.
„Gemo Fest“-ის მიზანია ადგილობრივი ეკონომიკის მოტივირება, მცირე მეწარმეების მხარდაჭერა და საქართველოს, როგორც ტურისტული ქვეყნის პოპულარიზაცია. თითოეული სტენდი, ყოველი დეგუსტაცია და თითოეული წარმოდგენა — ერთიანად ქმნიდა სურათს, თუ როგორ შეიძლება ტრადიციების, კულტურისა და სტუმართმოყვარეობის სინთეზით რეგიონმა განიცადოს ახალი განვითარება.
„გემო ფესტი“ ხელს უწყობს, როგორც ადგილობრივი სამზარეულოს პოპულარიზაციას, ისე სამცხე-ჯავახეთის ტურისტული პოტენციალის წარმოჩენას. ღონისძიებამ ტურისტებსა და სტუმრებს საშუალება მისცა, გაცნობოდნენ რეგიონში დამკვიდრებულ კულინარიულ ტრადიციებს. ამასთანავე, ეს იყო ახალი შესაძლებლობა ადგილობრივი მეწარმეებისთვის, საკუთარი პროდუქციის წარდგენისა და პოპულარიზაციისთვის.
„Gemo Fest 2025“ -მა კიდევ ერთხელ შეგვახსენა, რომ ჩვენი ქვეყნის მთავარი სიმდიდრე ადამიანები, ტრადიციები და სტუმართმოყვარეობაა.
