ახალდაბის მედიაკაფეში, „არაფორმალური განათლების ახალგაზრდულ მულტიმედიურ სასწავლო ცენტრში“ გაიმართა ახალი სასერთიფიკატო კურსი „პიროვნული უნარების განვითარება, პროფესიული ორიენტაცია და კარიერული დაგეგმვა“, პირველი ეტაპი.
კურსს წარმართავდა მოწვეული ტრენერი პროფორიენტაციისა და კარიერის დაგეგმვის საკითხებში მარიკა ვაჭარაძე, რომელიც არის ორგანიზაცია რეგიონული ინიციატივების ცენტრის „ნათელი მომავალი“-ს დამფუძნებელი და ხელმძღვანელი. ამავდროულად, მარიკა ვაჭარაძე გახლავთ საინფორმაციო ცენტრი ნატოსა და ევროკავშირის შესახებ ბიუროს ხელმძღვანელი იმერეთში.
ტრენინგის პირველი ეტაპი ძალიან საინტერესო და ინტერაქტიული იყო. მონაწილეებმა რამდენიმე თემაზე მიიღეს ამომწურავი ინფორმაცია. მათ შორის, გაეცვნენ პროფესიის არჩევის და კარიერის დაგეგმვის პროცესს, ჯორჯ ჰოლანდის 6 ტიპოლოგიას და კლიმოვის კლასიფიკაციას.
სალექციო და თეორიული ნაწილის შემდეგ მათ კონკრეტული სავარჯიშოები მიეცათ, რომელიც ჯგუფებში განიხილეს. ასევე, წარადგინეს პრეზენტაციები და შესაძლებლობა ჰქონდათ, საკუთარ პიროვნებებზე მოერგოთ ტიპოლოგიის და კლასიფიკაციის მახასიათებლები.
ტრენინგზე ყურადღება გამახვილდა სამ ძირითად ფაქტორზე, რომელიც პროფესიის არჩევის დროს მნიშვნელოვანია. ესენია: რა მსურს, რისი უნარი მაქვს და რა შემიძლია.
კურსის მონაწილეებმა მაქსიმალური ინფორმაცია მიიღეს პროფესიის არჩევის მნიშნელობის შესახებ, თუ რა არის პროფესიული ორიენტაცია და როგორია პროფესიის განსაზღვრის პროცესი, რა უნდა გავითვალისწინოთ პროფესიის არჩევისას, აღქმა და სტერეოტიპები, პროფესიის არჩევისას დაშვებული „ტიპური შეცდომები“, პროფესიის როლის გააზრება მომავლის დაგეგმვაში, მიზანი და გეგმის დასახვა, შრომითი ღირებულებები, ეროვნული საკვალიფიკაციო ჩარჩო და საქართველოში არსებული პროფესიათა სფეროები.
ტრენინგის პირველი ეტაპის დასრულების შემდეგ მონაწილეებმა მოკლე გითხვარი შეავსეს, რომელიც გარკვეულ საორიენტაციო მასალას შეადგენს პროგრამის განხორციელების შემდგომი ეტაპისთვის.
უახლოეს პერიოდში, 12 ივლისისთვის, დაგეგმილია სასრტიფიკატო კურსის მეორე ოთხდღიანი ტრენინგის გამართვა და შემდგომ ეტაპზე — ორდღიანი ტური სხვადასხვა სასწავლო დაწესებულებასა თუ ბიზნესკომპანიაში, სადაც ახალგაზრდებს საშუალება ექნებათ, ადგილზე გაეცნონ ამა თუ იმ პროფესიის წარმომადგენლებს და მოისმინონ მათი გამოცდილება თუ წარმატების ისტორიები.
პროექტი ხორციელდება „საქართველოს სტრატეგიული კვლევებისა და განვითარების ცენტრის“ მხარდაჭერით, პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში. პროექტი მიზნად ისახავს, გააძლიეროს სამოქალაქო საზოგადოება როგორც დამოუკიდებელი, მდგრადი, გამჭვირვალე და ანგარიშვალდებული აქტორი მთელი საქართველოს მასშტაბით.
პროექტს ახორციელებს კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად: საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციისა და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP).
პროექტს აფინანსებს ევროკავშირის და კონრად ადენაუერის ფონდი.
