“ამ კლუბმა, ინგლისურთან ერთად, მეგობრობა გვასწავლა” — ახალდაბის მულტიფუნქციური ცენტრის ინგლისურის კლუბის წევრებს სერტიფიკატები გადაეცათ

ბორჯომის მუნიციპალიტეტის დაბა ახალდაბაში, მედიაკაფე „ლუტრეზი“-ში,ბორჯომის მუნიციპალიტეტის დაფინანსებით “ახალგაზრდული მულტიფუნქციური ცენტრი” მოქმედებს.

როგორც ჩვენმა მკითხველებმა უკვე იციან, მიმდინარე წლის აგვისტოდან ცენტრში სხვადასხვა ტრენინგ-სემინართან ერთად, ინგლისურისა და თექის კლუბების ძალიან საინტერესო გაკვეთილები მიმდინარეობდა.

ამჯერად ინგლისური ენის კლუბის შესახებ გიამბობთ, რომლის მთავარი მიზანი გახლდათ ახალდაბელი მოსწავლეებისთვის ხელმისაწვდომობის გაზრდა, რომ მათ თანამედროვე ტექნოლოგიების გამოყენებით შეძლონ ინგლისური ენის ცოდნის გაუმჯობესება.

კლუბს ხელმძღვანელობს პრაქტიკოსი წარმატებული პედაგოგი, საუკეთესო გამოცდილებით, ახალდაბის საჯარო სკოლის მასწავლებელი თამარ დემეტრაშვილი.

კლუბში ახალგაზრდები, ენის დაუფლებასთან ერთად, სწავლობდნენ კრიტიკულ აზროვნებას, შემოქმედებითობას, გუნდურ და ინდივინდუალურ მუშაობას, პრეზენტაციების წარდგენის უნარებს.

ინგლისურის კლუბის პირველი სამთვიანი კურსი სერტიფიკატების გადაცემით დასრულდა.

კლუბის წევრებთან თამარ მასწავლებელმა შემაჯამებელი გაკვეთილი ჩაატარა და ახალგაზრდებსაც თავიანთი შთაბეჭდილებების გაზიარება სთხოვა. გთავაზობთ ნაწყვეტებს  ბავშვების გულწრფელი წერილებიდან:

• “მე ძალიან მომეწონა ინგლისურის კლუბში, რადგან აქ სწავლასთან ერთად, ძალიან მეგობრული გარემოა. როდესაც მოვდივარ “ლუტრეზი”-ში, მგონია, რომ მოვდივარ სახლში, სადაც ჩემი მეგობრები არიან” — ბარბარე ჩადუნელი;

• “ძალიან მომწონს ჯგუფური სამუშაოები, აგრეთვე ის, რომ თამუნა მასწავლებელი ყოველთვის ცდილობდა, მოსაწყენი არ ყოფილიყო ჩვენი გაკვეთილები… ჯგუფური სამუშაოები გვეხმარებოდა, რომ ბავშვები დავმეგობრებულიყავით და ერთმანეთს დავხმარებოდით. სამსაათიანი მეცადინეობისას გვქონდა შესვენებაც და სასუსნავებიც, რაც ასევე ძალიან გვიხაროდა… მე ეს კლუბი დამეხმარა ინგლისური ენის გაუმჯობესებაში” – ანასტასია ლომიძე;

• “კლუბის აქტივობებიდან განსაკუთრებულად დამამახსოვრდა ჯგუფური მეცადინეობები და ვიდეოგადაღებების დავალება… ჩემი აზრით,სკოლის გარეშე ასეთი კლუბები საჭიროა. კიდევ სხვა ბავშვებსაც ვუსურვებ მომავალში კლუბში მოსვლას” — ვალენტინა მაღლაფერიძე;

• “ინგლისურის კლუბი ძალიან მომეწონა, რადგან სწავლა ძალიან სახალისოა. ჯგუფური სამუშაოები, ინგლისური ფილმების ერთად ყურება, განხილვები, საუბრები — ეს უმნიშვნელოვანესი მომენტებია ჩემთვის. ამ კლუბმა, ინგლისურთან ერთად, გვასწავლა მეგობრობა…” — მარიამ კაპანაძე;

• “ინგლისურის კლუბში ძალიან ბევრ საინტერესო გაკვეთილი გვქონდა, ინგლისურად ვლაპარაკობდით,პრეზენტაციებს წარმოვადგენდით… მინდა, მადლობა გადავუხადო ქალბატონ ნატოს, რომ ასეთ აქტივობებს აკეთებს ახალგაზრდებისთვის თავის პატარა კაფეში, სახელად “ლუტრეზი». ასევე მინდა, მადლობა ვუთხრა თამუნა მასწავლებელს, რომელიც ინგლისურს იდეალურად მასწავლის როგორც სკოლაში, ისე — კლუბში, არაფორმალურ გარემოში.” — მარიამ ჩადუნელი.

• “მე ძალიან მომეწონა კლუბი და მინდა, რომ კიდევ გაგრძელდეს. აქ სწავლა არის ძალიან მეგობრულ და მხიარულ გარემოში, საინტერესო იყო ჩემთვის ჯგუფური პროექტები, სხვებსაც ვუსურვებ, რომ ამ კლუბში მოვიდნენ.” — ანნა სარალიძე;

• “ინგლისურის კლუბი ძალლიან დამეხმარა ინგლისურის უკეთ სწავლაში. ძალიან მომეწონა სახალისო ვიდეო-თამაში “კაჰუტი”. სხვებსაც ვურჩევ კლუბში მოსვლას”- სანდრო ოგანესიანი;

• “ინგლისურის კლუბში ბევრი სიახლე ვისწავლე. ძალიან მომეწონა, რომ სკოლის გარეთ, არაფორმალურ გარემოში, უფრო თავისუფლად ვიყავით და საინტერესო აქტივობებს გვთავაზობდა თამუნა მასწავლებელი. მე ძალიან მინდა, რომ გაგრძელდეს ინგლისურის კლუბი, ნახვამდის…” — ზუკა გოგალაძე;

• “ინგლისურის კლუბში ბევრი ახალი რამ ვისწავლე და ძალიან მომეწონა ის აქტივობები, ჯგუფური სამუშაოები და დავალებები, რასაც თამუნა მასწავლებელი გვასწავლიდა” — თორნიკე ქიმერიძე;

• “ინგლისურის კლუბი ძალიან კარგი შესაძლებლობაა ჩვენთვის, რომ მივიღოთ დამატებითი ცოდნა და უფრო კარგად ვისწავლოთ ინგლისური ენა. ჩემი აზრით, არაფორმალური განათლება ბავშვებისთვის ძალიან კარგია და საჭიროა. ჩვენ ამ კლუბში გავაკეთეთ არაერთი პრეზენტაცია, გადავიღეთ ვიდეოები, გვქონდა ბევრი ჯგუფური სამუშაო და ყველაფერს ამას ხალისით და სიყვარულით ვაკეთებდით” — ნინიკო ჩადუნელი.

***

მაშ ასე, ახალდაბის მულტიფუნქციურ ცენტრში ინგლისურის კლუბის პირველი სამთვიანი კურსი დასრულდა, ხოლო თექის კლუბის წევრები გამოფენისთვის ემზადებიან და ნოემბრის ბოლოს ბორჯომში საინტერესო გამოფენაზე უკვე გეპატიჟებით.

ყოველივე ეს კი ბორჯომის მუნიციპალტეტის მერიის მხარდაჭერის შედეგია, რისთვისაც უღრმეს მადლიერებას გამოვხატავთ და დარწმუნებული ვართ, რომ ეს თანამშრომლობა აუცილებლად გაგრძელდება.

სწორედ ამიტომ არ გემშვიდობებით, ნახვამდის…

მომავალშიც ბევრ საინტერესო სიახლეს შემოგთავაზებთ.

ნატო გუბელაძე