ჩვენმა მკითხველებმა უკვე იციან, რომ ბორჯომის მუნიციპალიტეტის დაბა ახალდაბაში რამდენიმე წელია, არსებობს ახალგაზრდული მედიაკაფე „ლუტრეზი“, რომელიც ახალგაზრდებისთვის ჯერჯერობით ერთადერთი კულტურულ-საგანმანათლებლო სივრცეა დაბაში.
სწორედ ახალგაზრდების სურვილებისა და ინიციატივების გათვალისწინებით „სამცხე-ჯავახეთის სათემო განვითარების ცენტრმა“ ბორჯომის მუნიციპალიტეტის მერიას წარუდგინა პროექტი, რომლის კონცეფცია ითვალისწინებს ახალდაბაში ახალგაზრდული მულტიფუნქციური ცენტრის ამოქმედებას და სხვადასხვა მიმართულებით კლუბურ მუშაობას. ეს ცენტრი თავის თავში გააერთიანებს არაფორმალური განათლების/კულტურის ცენტრს, თანამედროვე ტექნოლოგიების ათვისების უნარებს, მულტიმედია ჟურნალისტიკას, ხელოვნების კლუბს და სხვადასხვა სასწავლო სასერთიფიკატო კურსს.
დიდი მადლიერებით აღვნიშნავთ იმ ფაქტს, რომ ბორჯომის ადგილობრივი თვითმმართველობის მიერ უყოყმანოდ დაფინანსდა ახალგაზრდული პროექტი და იმედი გვაქვს, რომ სამომავლოდაც გაგრძელდება მათი მხრიდან ახალგაზრდების მხარდაჭერა.
ამჯერად მულტიფუნქციურ სასწავლო ცენტრში გვაქვს კლუბური მუშაობის სამი მიმართულება. ესენი არის: ინგლისური ენის კლუბი, ხელოვნების მოყვარულთა კლუბი, მულტიმედიისა და მედიაწიგნიერების კლუბი. თითოეულს ექნება როგორც თეორიული, ისე — პრაქტიკული ნაწილი. ყოველი კურსის ბოლოს გაიმართება ასევე ტესტირება და სერთიფიკატების გადაცემა.
- ინგლისური ენის კლუბის მთავარი მიზანია, გაზარდოს ახალდაბელი მოსწავლეების ხელმისაწვდომობა, რომ მათ თანამედროვე ტექნოლოგიების გამოყენებით გაიუმჯობესონ ინგლისური ენის ცოდნა. კლუბი მიზნად ისახავს, ენის დაუფლებასთან ერთად, მოსწავლეთა კრიტიკული აზროვნების, შემოქმედებითობის, გუნდური და ინდივინდუალური მუშაობის, პრეზენტაციების უნარების განვითარებას. კლუბის ხელმძღვანელობს პრაქტიკოსი წარმატებული პედაგოგი, საუკეთესო გამოცდილებით, ახალდაბის სკოლის მასწავლებელი თამარ დემეტრაშვილი.
- ხელოვნების მოყვარულთა კლუბი
ხელოვნების კლუბში პირველ ეტაპზე დაგეგმილია მოსწავლე-ახალგაზრდობისთვის ხატვის გაკვეთილების, დეკორატიული გამოყენებითი ხელოვნების შესწავლა. კურსის მიზანია, მოსწავლემ შეისწავლოს ტრადიციული და თანამედროვე მხატვრული დეკორატიული თექის დამზადების ტექნოლოგია. კურსის დროს მოსწაველეები თუშური მატყლის გამოყენებით შეასრულებენ სიბრტყობრივ და მოცულობით ნამუშევრებს. ხელოვნების კლუბში ასევე, პერიოდულად მოვაწყობთ სხვადასხვა ხასიათის ფილმის ჩვენებებს და შემდგომ დისკუსია-დიალოგებს, ხოლო წიგნის მოყვარულთათვის თვეში ერთხელ გავმართავთ წაკითხული წიგნის განხილვა-დისკუსიას. კლუბს ხელმძღვანელობსთბილისის აპოლონ ქუთათელაძის სახელობის სახელმწიფო სამხატვრო აკადემიის ხელოვნებათმცოდნეობის მაგისტრი ვენერა (ვიკა) ჩოგოვაძე.
- მულტიმედიისა და მედიაწიგნიერების კლუბი
კლუბის საქმიანობა ძირითადად ორი მიმართულებით წარიმართება: მულტიმედიაჟურნალისტიკისა და მედიაწიგნიერების განვითარებით ახალგაზრდებში.
კლუბის საქმიანობა ხელს შეუწყობს ახალგაზრდების გააქტიურებას და მათ “მოქალაქე ჟურნალისტებად” ჩამოყალიბებას, მათთვის ციფრული ტექნოლოგიების გამოყენებით მულტიმედიაუნარების განვითარებას, ადგილობრივი სათემო პრობლემების იდენტიფიცირებას, აქტუალიზაციას და ადვოკატირებას, მულტიმედიური ჟურნალისტური მასალების მომზადების, ფოტოგრაფიის და ვიდეოგრაფიის საწყისი უნარების სწავლებას.
მულტიმედიისა და მედიაწიგნიერების კლუბში ახალგაზრდები შეისწავლიან ასევე თანამედროვე ძალიან მოთხოვნად ციფრულ პროფესიებს:
- ვიდეოგრაფია, სოციალური ქსელების მართვა და ციფრული მარკეტინგი.
- ხელოვნურ ინტელექტთან სწორად მუშაობა;
აპლიაკცია CANVA Pro ვერსია — ფუნქციონალები სრულად და დამატებით 3 თვე უფასო წვდომა აპლიკაციის ფასიან ვერსიასთან;
- აპლიკაცია Cap-cut პრო ვერსიასთან მუშაობა და საჩუქრად 1 თვე უფასოდ წვდომა ფასიან ვერსიასთან;
- რეკლამირება META — ს პლათფორმებზე;
- ფოტო-ვიდეო გადაღება, საკუთარი ბლოგის მართვა, მსახიობის ოსტატობა — ეს ყველაფერი ფიზიკურ სივრცეში — სრულად პრაქტიკულად;
- Meta-ს პლათფორმების სრულად ტექნიკურად გამართვა FB, IG, WhatsApp;
- Tik-Tok სტრატეგია და რეკლამირება ტიკტოკზე;
- Copywriting — გაყიდვადი ქოფის წერა
- ბიზნესის განვითარების სტრატეგიის დაგეგმვა და უამრავი სხვა რამ.
მულტიმედიისა და მედიაწიგნიერების კლუბის საქმიანობის მეორე მნიშვნელოვანი მიმართულებაა მედიაწიგნიერების უნარების დაუფლება, რაც მოსწავლეს დაეხმარება, შეძლოს როგორც ახალი სტილისა და მრავალგვარი ფორმის მულტიმედია ტექსტების აღქმა-გააზრება, ინტერპრეტირება, გამოყენება და შექმნა, ასევე — მედიასამყაროში ორიენტირება, სწორი არჩევანის გაკეთება, ინფორმაციის „გაფილტვრა“ და მიღებული ინფორმაციის კრიტიკულად შეფასება.
კლუბს ხელმძღვანელობს: ჟურნალისტი, მედიამენეჯერი გულიზა (ნატო) გუბელაძე
მოწვეული არიან ასევე შესაბამისი კომპეტენციის ტრენერები: სამოქალაქო ჟურნალისტიკა, ახალგაზრდები და ადგილობრივი თვითმმართველობა — იურისტი პაატა ცნობილაძე; მედიაწიგნიერება — ჟურნალისტი დავით ლიკლიკაძე, ფოტო/ვიდეოგრაფია, ციფრული უნარები და სოციალური მარკეტინგი — ნინო ჩხეიძე.
მნიშვნელოვანია ის ფაქტი, რომ ბორჯომის მუნიციპალიტეტის ადგილობრივი თვითმმართველობა დიდ მხარდაჭერას იჩენს ახალგაზრდების მიმართ. ამის ერთ-ერთი დასტურია ისიც, რომ მერიისა და საკრებულოს გადაწყვეტილებით ახალდაბაში “ახალგაზრდული მულტიფუნქციური სასწავლო ცენტრი» ამოქმედდა, რაც, ფაქტობრივად, სოფლის განვითარების ახალი მიდგომების თვალსაჩინო მაგალითი იქნება. იგი გამოაცოცხლებს ადგილობრივი ახალგაზრდების ყოველდღიურობას, დაეხმარება მათ პროფესიული ორიენტაციის ჩამოყალიბებაში, პერსონალურ და კარიერულ წინსვლაში. დიდ მოტივაციას გაუჩენს სოფლად მცხოვრებ ახალგაზრდებს ახალგაზრდული ინიციატივების განხორციელებისათვის; სამოქალაქო აქტიურობის და ჩართულობისათვის; კულტურულ- საინფორმაციო, შემეცნებითი და გასართობი ღონისძიებების ორგანიზებისთვის; ტურიზმის განვითარების ხელშეწყობისათვის.
ნატო გუბელაძე
“სამცხე-ჯავახეთის სათემო განვითარების ცენტრი”-ს დირექტორი
ახალდაბის მედიაკაფე “ლუტრეზი”-ს ხელმძღვანელი
