სოფლების მიხედვით მოსახლეობასთან შეხვედრები 13 თებერვლიდან 22 თებერვლის ჩათვლით გაიმართება
ბორჯომის მუნიციპალიტეტის საკრებულოს თავმჯდომარემ დავით ზაალიშვილმა და ქალაქის მერმა ოთარ არბოლიშვილმა საკრებულოს მაჟორიტარ დეპუტატებთან და მერის წარმომადგენლებთან სამუშაო შეხვედრა გამართეს და სოფლის პროგრამის ფარგლებში განსახორციელებელი პროექტების შესახებ ისაუბრეს. შეხვედრას ბორჯომის მუნიციპალიტეტის საკრებულოს თავმჯდომარის მოადგილე ნიკოლოზ კიკნაძე და მერის მოადგილე გიორგი ტაბატაძე ესწრებოდნენ.
უკვე ცნობილია, რომ ბორჯომის მუნიციპალიტეტში, ,,სოფლის მხარდაჭერის პროგრამის” ფარგლებში, პრიორიტეტების შერჩევის მიზნით, მოსახლეობასთან შეხვედრები 13-დან 22 თებერვლის ჩათვლით გაიმართება.
ბორჯომის მუნიციპალიტეტს „საქართველოს რეგიონებში განსახორციელებელი პროექტების ფონდი“-დან 436 000 ლარი გამოეყო. ხოლო, ადგილობრივი ბიუჯეტიდან 872 000 ლარი დაიხარჯება. თითოეულმა სოფელმა ინფრასტრუქტურული პროექტის განსახორციელებლად თანხა მოსახლეობის რაოდენობის გათვალისწინებით მიიღო.
დასაფინანსებელი პროექტების შერჩევის მიზნით, ადგილობრივი მაცხოვრებლები საერთო კრებებზე ან საკონსულტაციო შეხვედრებზე, ხმათა უმრავლესობით გადაწყვეტენ, რას მოხმარდება დასახლებისთვის გამოყოფილი თანხა.
