27 ნოემბერს ახალდაბის ახალგაზრდულ მედიაკაფე „ლუტრეზი“-სთან არსებულმა თექის კლუბმა სამთვიანი კურსის საანგარიშო გამოფენა და მასტერკლასი წარმოადგინა.
გამოფენა ბორჯომში, მუსიკალური სკოლის შენობაში, გაიმართა და დამთვალიერებელთა დიდი მოწონება და აღფრთოვანება გამოიწვია.
„ეს მართლა ბავშვების ნამუშევარია?“ — გაოცებას ვერ მალავდა ურავლესობა, როცა თექისგან შექმნილ ულამაზეს სურათებს, „გოგრებს“, „ატმებს“, „ჩიტებს“, ქუდებსა თუ შარფებს ათვალიერებდა.
გამოფენის პარალელურად კი, მუსიკალური სკოლის წინ ახალგაზრდებმა ცოცხალი მასტერკლასი შესთავაზეს სტუმრებს და დამთვალიერებლებსაც ასწავლეს თექაზე მუშაობის საბაზისო ელემენტები.
აღსანიშნავია, რომ ამ კლუბური მუშაობის შესაძლებლობა ახალდაბელ მოსწავლეებს ბორჯომის მუნიციპალიტეტის მერიის დაფინანსებული პროექტის ფარგლებში მიეცათ და შესაბამისად, საანგარიშო გამოფენას ადგილობრივი თვითმმართველობის წარმომადგენლებიც სტუმრობდნენ: ბორჯომის მერიის კულტურის სამსახურის ხელმძღვანელი შალვა გოგოლაძე, კულტურის სამსახურის სპეციალისტი ლანა გიორგიძე, საკრებულოს თავმჯდომარის პირველი მოადგილე ნიკოლოზ კიკნაძე, საკრებულოს წევრები: სალომე თედელური, ლევან თედიაშვილი, ასევე — საქართველოს პარლამენტის სამცხე-ჯავახეთის დელეგატის, ანტონ ობოაშვილის წარმომადგენელი, მარიამ სიმონიშვილი.
პროექტის ხელმძღვანელმა, ახალდაბის მედიაკაფისა და მულტიფუნქციური ცენტრის დირექტორმა, ნატო გუბელაძემ, სტუმრებს გააცნო პროექტის ფარგლებში განხორციელებული აქტივობები. მისი თქმით, ახალდაბაში, მედიაკაფე „ლუტრეზი“-ს ბაზაზე ჩამოყალიბდა „ახალგაზრდული მულტიფუნქციური ცენტრი“, სადაც სამი თვის მანძილზე მიმდინარეობდა კლუბური მუშაობები სამი მიმართულებით: ხელოვნების მოყვარულთა კლუბი — დეკორატიულ თექაზე მუშაობის გაკვეთილები პედაგოგ ვენერა (ვიკა) ჩოგოვაძის ხელმძღვანელობით; ასევე — ინგლისური ენის კლუბი, პედაგოგ თამარ დემეტრაშვილის ხელმძღვანელობით.
გარდა ამისა, მოწვეული მენტორების მიერ ახალდაბელი ახალგაზრდებისთვის გაიმართა რამდენიმე ტრენინგი სოციალური მედია-მარკეტინგის, მულტიმედიისა და მედიაწიგნიერების მიმართულებით.
დღევანდელი გამოფენა კი, ფაქტობრივად, იმის დასტური გახლავთ, რომ ახალგაზრდების ინტერესი ძალიან დიდია დეკორატიულ თექაზე მუშაობის მიმართულებით და მათი სურვილია, პროექტის სხვადასხვა კლუბური მუშაობა მომავალ წელსაც გაგრძელდეს.
“ვფიქრობთ, რომ „ახალდაბის ახალგაზრდული მულტიფუნქციური სასწავლო ცენტრი» სოფლის განვითარების ახალი მიდგომების თვალსაჩინო მაგალითია, გამოაცოცხლა ადგილობრივი ახალგაზრდების ყოველდღიურობა. ფაქტობრივად, პირველად შესთავაზა მათ კომფორტული არაფორმარული გარემო და დიდ მოტივაციასაც უჩენს ახალგაზრდული ინიციატივების განხორციელებისათვის, კულტურულ-საინფორმაციო, შემეცნებითი და გასართობი ღონისძიებების ორგანიზებისთვის, ლიტერატურული საღამოებისთვის, დისკუსიებისთვის, კინოჩვენებებისთვის, გამოფენებისთვის, მედიატურების, ტრენინგებისა თუ ვორქშოფებისთვის.
შემაჯამებელი რეზიუმე რომ გავაკეთოთ, პროექტის სამივე მიმართულებაში, საერთო ჯამში, ტრენინგები და მასტერ-კლასები გაიარა 50-მდე ახალგაზრდამ ახალდაბაში.
თუმცა, ახალგაზრდების დაინტერესება და მოთხოვნა გაცილებით მეტია ყველა მიმართულებით, ამიტომ ძალიან მნიშვნელოვანია ადგილობრივი მერიის და თვითმმართველობის მხარდაჭერა, რის გამოც გულწრფელ მადლიერებას გამოვხატავთ“- აღნიშნა პროექტის აქტივობებზე საუბრისას ნატო გუბელაძემ.
ადგილობრივი ხელისუფლების წარმომადგენლებმა გამოფენის მონაწილე ახალდაბელ ახალგაზრდებს სერტიფიკატები გადასცეს, წარმატებები უსურვეს და მხარდაჭერაც აღუთქვეს სამომავლო პროექტების განსახორციელებლად.
გამოფენის ორგანიზატორებმა ძალიან საინტერესო შემოთავაზება მიიღეს ბორჯომის ისტორიული მუზეუმის ხელმძღვანელობიდან, რომ მუზეუმის საერთაშორისო დღესთან დაკავშირებით, 18 მაისიდან ისინი ახალდაბელი ახალგაზრდების ამ ნამუშევრებს მუზეუმში გამოფენენ ერთი წლის მანძილზე. უდიდესი მადლობა მათ ამ შემოთავაზებისათვის.
შეიძლება, ითქვას, რომ «ნანახმა მოლოდინს გადააჭარბა» — ახალდაბის თექის კლუბის პირველი წარმატება მართლაც შთამბეჭდავი გამოვიდა… მადლობა ყველას, ვინც მცირედი წვლილიც კი შეიტანა ამ დიდებულ საქმეში: ბორჯომის ადგილობრივი თვითმმართველობის და მერიის ხელმძღვანელობას — პროექტის დაფინანსებისათვის; მულტიფუნქციური ცენტრის პედაგოგებს — მაღალი დონის პროფესიონალიზმისათვის, ახალდაბელ ახალგაზრდებს — გამოჩენილი ინტერესისთვის და ულამაზესი ნამუშევრების მომზადებისთვის.
და ბოლოს, დიდი მადლობა ბორჯომის მუსიკალური სკოლის ხელმძღვანელს — გამოფენისთვის სასწავლებლის სივრცის დათმობისა და მხარდაჭერისთვის.
მარიკა ყაულაშვილი
პროექტის კოორდინატორი
