სამცხე-ჯავახეთში სახელმწიფო რწმუნებულმა ბესიკ ამირანაშვილმა, ბაკურიანში ზამთრის საკურორტო სეზონის შემაჯამებელი შეხვედრა გამართა, რომელსაც ბორჯომის მუნიციპალიტეტის, „ენერგო პრო ჯორჯიას“, ბაკურიანის განვითარების სააგენტოს და ბიატლონის ფედერაციის წარმომადგენლები ესწრებოდნენ.
შეხვედრაზე აღინიშნა, რომ გასული სეზონი განსაკუთრებული და გამორჩეული იყო ბორჯომის მუნიციპალიტეტისათვის – ბაკურიანში და ამასთანავე, ქვეყნის მასშტაბით, პირველად გაიმართა ევროპის ზამთრის ახალგაზრდული ოლიმპიური ფესტივალი. ხაზი გაესვა იმ ფაქტს, რომ ჩატარებულმა ღონისძიებამ ოლიმპიური კომიტეტისგან უმაღლესი შეფასება მიიღო.
კურორტისათვის მნიშვნელოვანი შენაძენია, ოლიმპიური ფესტივალისათვის, სახელმწიფოს მიერ მოწყობილი სპორტული და საჯარო ინფრასტრუქტურა, რაც მომავალში კიდევ უფრო გაზრდის ბაკურიანით დაინტერესებასა და ვიზიტორთა რაოდენობას.
ბესიკ ამირანაშვილმა წარმატებული სეზონის ჩატარებისათვის მადლობა გადაუხადა შეხვედრის მონაწილეებს და ევროპის ზამთრის ახალგაზრდული ფესტივალის ჩატარებაში განსაკუთრებული წვლილისთვის პრემიერისგან მადლობის სიგელები გადასცა.
შეხვედრას, ასევე დაესწრნენ – რწრმუნებულის მოადგილე დავით ვარდიაშვილი, აპარატის უფროსი გიორგი მიქელაძე, ბორჯომის მუნიციპალიტეტის მერი ოთარ არბოლიშვილი და საკრებულოს თავჯდომარე დავით ზაალიშვილი.
EYOF Bakuriani 2025 ფესტივალზე 45 ქვეყნის 2 ათასამდე სპორტსმენმა იასპარეზა სპორტის 8 დისციპლინაში: სამთო სათხილამურო სპორტი, ბიატლონი, თხილამურებით რბოლა, ფრისტაილი, სნოუბორდი, ყინულის ჰოკეი, ფიგურული ციგურაობა და ციგურებით რბოლა. ფესტივალზე სულ 8 ქართველმა სპორტსმენმა მიიღო მონაწილეობა.
