ქართველ მევენახეებს ონლაინ ვიდეო კურსების მეშვეობით ვაზის ზამთრისა და მწვანე სხვლის შესახებ სიღრმისეული ცოდნის შეძენის შესაძლებლობა აქვთ. გაეროს სურსათისა და სოფლის მეურნეობის ორგანიზაციის (FAO) ვენახის ინტეგრირებული მართვის საერთაშორისო ექსპერტის, ხულიო პრიეტო დიაზის ქართულ ენაზე გახმოვანებული ვიდეო კურსები ხელმისაწვდომია ვებსაიტზე pruning.ge. ონლაინ საგანმანათლებლო პლატფორმა FAO-ს მხარდაჭერითა და ევროკავშირისა და შვედეთის დაფინანსებით შეიქმნა ENPARD IV პროგრამის ფარგლებში.
აღნიშნული საგანმანათლებლო კურსების მიზანს, ყურძნის გაუმჯობესებული წარმოების ხელშეწყობით საქართველოში ღვინის სექტორში კონკურენტუნარიანობის გაუმჯობესება წარმოადგენს როგორც ქვეყნის ბაზარზე, ასევე მის ფარგლებს გარეთ. ამასთანავე, სხვლის საუკეთესო პრაქტიკების დანერგვით შემცირდება ფიტოსანიტარული პრეპარატების გამოყენება, რაც მნიშვნელოვნად სასიკეთო გავლენას ახდენს გარემოს მდგრადობისა და მომხმარებლამდე უფრო უვნებელი სურსათის მიტანის თვალსაზრისით.
Pruning.ge ორ ვიდეო კურსს მოიცავს: ვენახის სხვლა და ფორმირება და მწვანე სხვლა. პირველი კურსი ვაზის ზამთრის სხვლის მეთოდებს ეხება, რაც მოიცავს ისეთ საკითხებს, როგორებიცაა ვაზის სტრუქტურის ჩამოყალიბება, მოსავლის რეგულირება და მცენარის მომდევნო სეზონის ზრდის ციკლისთვის მომზადება. ონლაინ კურსი მწვანე სხვლის შესახებ ფოკუსირებულია მცენარის მწვანე მასის, ყლორტების მართვაზე და მოიცავს ისეთ საკითხებს, როგორიცაა ზრდის დაბალანსება, ამონაყრის მოცილება და ვარჯის მართვის გაუმჯობესება, რათა მცენარეს ჰქონდეს უკეთესი წვდომა მზის სხივებზე და გაუმჯობესდეს ჰაერის ცირკულაცია.
ვაზის სხვლის საუკეთესო პრაქტიკების დანერგვა ვენახის ხარისხს, ეფექტურობას, პროდუქტიულობასა და ჯანმრთელობას აუმჯობესებს. ვაზი ქართული კულტურის ერთ-ერთი ფუნდამენტური ნაწილია და ქვეყნის სოფლის მეურნეობის სიმბოლოს წარმოადგენს. ის აუცილებლად უნდა გახდეს უფრო მედეგი კლიმატური ცვლილების მიმართ და ამავდროულად, უკეთესი ხარისხის, მეტი მოსავალი აწარმოოს. ვენახის ეფექტური მართვისთვის კი აუცილებელია ვაზის სხვლა, რაც გაუმჯობესებულ ფიტოსანიტარულ მდგომარეობას განაპირობებს.
„სხვლის ტექნიკების შესახებ სიღრმისეული ცოდნის მიღება და გამოყენება უფრო მაღალი ხარისხის მოსავლის წინაპირობაა და ვენახის კეთილდღეობას უზრუნველყოფს. შესაბამისად, ონლაინ კურსები შესანიშნავი შესაძლებლობაა ქვეყნის ღვინის სექტორისთვის კლიმატის ცვლილებასთან და დაავადებებთან დაკავშირებულ რისკებთან გამკლავებისთვის და ღვინის წარმოებისთვის, რომელიც ურო კონკურენტუნარიანია როგორც ქვეყნის, ასევე ევროპის ბაზრებზე. ქართულ ენაზე მოსაუბრე მევენახეებს ვურჩევ, რომ გამოიყენონ ეს უნიკალური შანსი“, ამბობს გუიდო აგოსტინუჩი, FAO-ს პროგრამის მენეჯერი.
“სხვლის შესახებ თეორიული და ტექნიკური ცოდნა განსაკუთრებით მნიშვნელოვანია ქართველი მევენახეებისთვის ვენახის ჯანმრთელობისა და პროდუქტიულობის ფიტოსანიტარული პირობების დაბალანსების მეშვეობით გასაუმჯობესებლად, რაც დადებით ზეგავლენას იქონიებს გარემოსა და მომხმარებელზე. შესაბამისად, ევროკავშირისა და შვედეთის ENPARD IV პროგრამის ფარგლებში FAO-ს მხარდაჭერით, ონლაინ ვიდეო გაკვეთილები კიდევ ერთი შესაძლებლობაა პირველადი წარმოების განვითარებისთვის”, ამბობს დენის რეისი, საქართველოში ევროკავშირის წარმომადგენლობის მდგრადი სასურსათო სისტემების პროგრამის მენეჯერი.
პრაქტიკისა და კონკურენტუნარიანობის გაუმჯობესებით დაინტერესებულ ღვინის სექტორის წარმომდგენლებს შეუძლიათ შეავსონ ონლაინ ფორმა. შემოსული განაცხადების შერჩევის შედეგად, მათ pruning.ge-ზე უფასო წვდომა მიეცემათ ორივე კურსზე.
___
ევროკავშირის შესახებ
30 წელზე მეტია ევროკავშირს საქართველოსთან მჭიდრო პარტნიორული ურთიერთობა აკავშირებს. ქვეყნის განვითარებას ევროკავშირი ცოდნისა და გამოცდილების გაზიარებით და ექსპერტული, ინოვაციებისა და ფინანსური მხარდაჭერის გზით ახორციელებს. ევროკავშირსა და საქართველოს მოქალაქეებს შორის ურთიერთობა მშვიდობის, თავისუფლების, დემოკრატიის, ადამიანის უფლებებისა და ინკლუზიური ეკონომიკური ზრდის საერთო ღირებულებებს ეფუძნება. საქართველოში ევროკავშირის მხარდაჭერის შესახებ მეტი ინფორმაცია იხილეთ მითითებულ ბმულზე: https://eu4georgia.eu/ka/evrokavshiri-sakartveloshi/
ENPARD პროგრამის შესახებ
ევროკავშირი, ENPARD პროგრამის ფარგლებში, მხარს უჭერს სოფლის მეურნეობასა და სოფლის განვითარებას საქართველოში. სოფლად ეკონომიკური შესაძლებლობების გაძლიერებისა და საქართველოში სიღარიბის შემცირების მიზნით ENPARD პროგრამა 2013 წლიდან ხორციელდება. პროგრამა, საწყის ეტაპზე, მხარს უჭერდა სოფლის მეურნეობის პოტენციალის განვითარებას ქვეყანაში. მომდევნო ეტაპზე, პროგრამა ასევე კონცენტრირდა სოფლად მცხოვრები მოსახლეობისთვის ეკონომიკური შესაძლებლობების გაჩენის ხელშეწყობაზე. 2021 წლიდან პროგრამა ქვეყნის მხარდაჭერას სურსათის უვნებლობის გაუმჯობესების კუთხითაც ახორციელებს ევროკავშირისა და შვედეთის ფინანსური მხარდაჭერით, ENPARD IV-ის ფარგლებში, სურსათის უვნებლობის კომპონენტის მთავარ განმახორციელებელ ორგანიზაციებთან, FAO-სა და ჩეხეთის განვითარების სააგენტოსთან ერთად.
