აშშ-ის ელჩი რობინ ლ. დანიგანი ბორჯომს სტუმრობდა
აშშ-ის ელჩი რობინ ლ. დანიგანი საქართველოს რეგიონებს ეცნობა და ადგილობრივ ხელმძღვანელობას ხვდება. ის თბილისისა და ბათუმის შემდეგ ბორჯომს პირველად ესტუმრა.
ქალბატონმა დანიგანმა ბორჯომი-ხარაგაულის ნაკრძალი დაათვალიერა და შემდეგ ბორჯომის მერთან, ბატონ ოთარ არბოლიშვილთან, ოფიციალური შეხვედრა გამართა.
შეხვედრაზე ყურადღება გამახვილდა სამომავლო გეგმებზე ეკონომიკის და ტურიზმის განვითარების თვალსაზრისით. ასევე — კულტურული მემკვიდრეობის დაცვის საკითხზე.
ოთარ არბოლიშვილმა დიპლომატს დაუდასტურა მზადყოფნა, კიდევ უფრო განვითარდეს პარტნიორული ურთიერთობები.
ადგილობრივ ტელევიზიასთან საუბრისას ქალბატონმა დანიგანმა აღნიშნა, რომ ის ბორჯომში პირველადაა და ძალიან მოეწონა ეს პატარა ქალაქი: „ ბორჯომში პირველად ვიმყოფები, მაგრამ ეს ვიზიტი არ იქნება ბოლო. მიხარია, რომ მერთან შეხვედრის შესაძლებლობა მქონდა. ვისაუბრეთ სამომავლო გეგმებზე, ეკონომიკასა და ტურიზმის განვითარებაზე, ასევე — იმ მდიდარი კულტურული მემკვიდრეობის დაცვის საკითხებზე, რომელიც თქვენს რეგიონშია. ვიმყოფებოდი ბორჯომ-ხარაგაულის პარკში, შევხვდი მენეჯერს და რეინჯერებს. ძალიან კარგი სერვისი არსებობს იქ. აგრეთვე დავესწარი კონფერენციას,სადაც საუბარი იყო არჩევნებზე, დემოკრატიაზე. საბოლოო ჯამში, მინდა, გითხრათ, რომ გაქვთ ძალიან კარგი ქალაქი, არაჩვეულებრივი წყალი და ბუნება. მე დავპირდი მერს, რომ აუცილებლად დავბრუნდები აქ კვლავ, ჩემს ოჯახთან ერთად.“ — განაცხადა ქალბატონმა რობინ ლ. დანიგანმა
ელჩთან შეხვედრით ასევე კმაყოფილება გამოხატა ბორჯომის მერმა, ბატონმა ოთარ არბოლიშვილმა:
„მართლაც მნიშვნელოვანი და ძალიან კარგი შეხვედრა იყო. ვისაუბრეთ ისეთ საკითხებზე, როგორიც არის კულტურული მემკვიდრეობა, ტურისტული და სამეწარმეო რესურსები ბორჯომის რეალობაში. ამ კუთხით ამერიკის ელჩმა სრული მხარდაჭერა გამოგვიცხადა, რაც სამომავლოდ დადებითად აისახება ბორჯომის მუნიციპალიტეტზე. აგრეთვე, მხარდაჭერა გამოგვიცხადა გაცვლით პროგრამებში მონაწილეობის მიღებაზე, რომელიც გათვალისწინებული იქნება სხვადასხვა სფეროში დასაქმებული აქტიური თანამშრომლებისთვის. შეგვიძლია შუამდგომლობა გავუწიოთ კომპანიებს, რათა მეტი ეკონომიკური სარგებელი მიიღონ».
მოამზადა ნატა ლუტიძემ
