საქართველოში ბევრი წარმატებული ახალგაზრდა ცხოვრობს და დღეს ერთ-ერთ მათგანს გაგაცნობთ, 17 წლის ელენა მიდელაშვილს, რომელიც კასპის რაიონის სოფელ კოდიწყაროში ცხოვრობს. მან წელს დაამთავრა ნიგოზას საშუალო სკოლა და სტუდენტი გახდა. ასაკის მიუხედავად, დღესდღეობით ელენე წარმატებული კარიერული მენტორია, ატარებს მასტერ-კლასებს და ბევრ ახალგაზრდას ეხმარება საკუთარი თავის პოვნაში. რაც თვითონაც დიდ სიამოვნებას ანიჭებს და რაღა თქმა უნდა – მსმენელსაც.
ელენა, ფაქტობრივად, მთელმა საქართველომ გაიცნო მისი შექმნილი ორგანიზაციით ‘’თაობათა გზამკვლევი’’. როგორც თვითონ ამბობს, ეს იდეა 15 წლის ასაკში გაუჩნდა და
საკმაოდ დიდი გზა გაიარა, რომ მიზნისთვის მიეღწია, რაც ნამდვილად გამოუვიდა.
‘’თაობათა გზამკვლევი’’ ონლაინ პლატფორმაა და ახალგაზრდებს ეხმარება არაფორმალური განათლების მიღებაში. ორგანიზაცია მთლიანად მოხალისეობრივ
საწყისებზე საქმიანობს, ჰყავს მენეჯერი, პიარ მენეჯერი და ასისტენტები მთელი ქვეყნის მაშტაბით. მეც ამ გუნდის წევრი ვარ ბორჯომიდან და ძალიან მეამაყება. ინტერვიუში ბევრ საინტერესო ამბავს გაიგებთ ელენას შესახებ.
დიალოგი
- ელენა, გვიამბე შენს შესახებ, რას საქმიანობ ამჟამად?
- ჩემი საქმიანობა ამ ეტაპზე ორი მიმართულებით ვითარდება. მე ვარ კარიერული მენტორი და ორგანიზაცია “თაობათა გზამკვლევის” დამფუძნებელი დირექტორი. ვმუშაობ როგორც ორგანიზაციაში, ჩემს გუნდთან ერთად, ასევე ვატარებ შეხვედრებს და კონსულტაციებს პროფორიენტაციის მიმართულებით. პარალელურად, აქტიურად ვაწარმოებ პროფესიულ ბლოგს, რომელსაც ძალიან დიდ დროს ვუთმობ, რადგან საკამოდ შრომატევადი პროცესია.
- მაინც რატომ გაგიჩნდა ორგანიზაციის შექმნის სურვილი და რა მიზნები გაქვთ?
- “თაობათა გზამკვლევი” არის საგანმანათლებლო ორგანიზაცია, რომელიც ჯერჯერობით მოხალისეობრივ ჭრილში ფუნქციონირებს. ეს არის არაფორმალური განათლების ონლაინ სივრცე, სადაც ინტენსიურად ტარდება სხვადასხვა საკითხებთან დაკავშირებული ტრენინგები, ვებინარები და კურსები. „თაობათა გზამკვლევში“ მუშაობს საკმაოდ პასუხისმგებლიანი საორგანიზაციო ჯგუფი, რომელსაც მოაქვს აუდიტორიამდე ინფორმაცია შეხვედრების შესახებ. ორგანიზაციის ამჟამინდელი ინტერესია, რაც შეიძლება მეტმა ადამიანმა მიიღოს არაფორმალური განათლება სრულიად უფასოდ და აიმაღლოს ცნობიერება მისთვის საინტერესო საკითხში.
ორგანიზაციის შექმნის იდეა თითქმის 2 წლის წინ გაჩნდა. სანამ “თაობათა გზამკვლევი” შეიქმნებოდა, მე სხვა მსგავს ორგანიზაციაში ვმუშაობდი, თუმცა გარკვეული უსიამოვნებების გამო წამოვედი. გული დამწყდა, რადგან ძალიან მომწონდა ეს საქმე და მაშინ ჩემმა მეგობარმა, რომელიც ასევე გამოცდილი იყო ამ საკითხში, შემომთავაზა, ჩვენი ორგანიზაცია დაგვეარსებინა. ამ ნაბიჯს არ გადავდგამდი, რომ არ მიყვარდეს ადამიანებისთვის ამ შრომის გაწევა და მათი მადლიერებით სიამოვნების მიღება.
დღეს ორგანიზაციის სათავეში მარტო ვარ, მაგრამ მყავს არაჩვეულებრივი მენეჯერები და ასისტენტები, რომლებიც თავიანთი საქმის იდეალური კადრები არიან.
-როგორ ფიქრობ, გაამართლა თუ არა შენმა მოლოდინებმა ორგანიზაციასთან დაკავშირებით ?
– თავიდან ვღელავდი და დიდად გამართლების იმედი არ მქონდა, რაც ჩემი ასაკიდანაც გამომდინარეობდა ( 15 წლის ვიყავი ) და ამ უიმედობის ფონზე, სოციალურ ქსელში “თაობათა გზამკვლევის” ფეიჯის, ლოგოს, ქავერის და სხვა დეტალების შექმნიდან რამდენიმე თვე ვერ ვბედავდი, გადამედგა პირველი ნაბიჯები და აქტიურად დამეწყო მუშაობა. დასაწყისში მარტო ვაკეთებდი ყველაფერს, მაგრამ ნელ-ნელა სისტემის შენება დავიწყე, ჩემი გუნდი გაიზარდა, ორგანიზაციას მათ ცნობადობა მოუტანეს და ახალი აუდიტორიაც აქტიურად შემოგვიერთდა. უსაზღვროდ მაბედნიერებდა, როცა ვხედავდი, თურმე ღირდა …
ახლა ორგანიზაცია, მე ვფიქრობ, საკმაოდ წინ არის, მითუმეტეს, იმის ფონზე, რომ დაფუძნებიდან ამ 2 წლის განმავლობაში პირველი რამდენიმე თვე არ მუშაობდა აქტიურად და სამწუხაროდ, მას შემდეგაც, შუალედში დიდი პაუზა მქონდა, პირადი პრობლემების გამო. რაღაც მომენტში ვფიქრობდი კიდეც, რომ აზრი აღარ ჰქონდა და ვეღარ შევძლებდი, მაგრამ ერთ დღესაც ყოველგვარი ხელსაყრელი პირობების მოლოდინის გარეშე ვთქვი, რომ ორგანიზაცია მუშაობას გააგრძელებდა და ასეც მოხდა! დღეს ძალიან, ძალიან ვამაყობ ჩემი ამ გადაწყვეტილებით და ჩემი გუნდის წევრებით, რომლებიც თავს არ ზოგავენ “თაობათა გზამკვლევისთვის”.
- ელენა, მკითხველისთვის საინტერესოა, შენს თემში რამდენად აქტიური ხარ?
- ჩემს თემში იქიდან გამომდინარე, რომ “ამყოლები” თითქმის არ მყავს, აქტიურობის და ბრძოლის აზრს ვერ ვხედავ. მიუხედავად იმისა, რომ ბევრი აქტივობის განხორციელება შეიძლება და თანაც, ეს თემს სჭირდება, მოქმედება ორმხრივი უნდა იყოს, ჩემს აქტიურობას შედეგი უნდა მოჰქონდეს და ამ შედეგს უნდა უფრთხილდებოდნენ. ასე რომ, თემის ფარგლებს გარეთ, სადაც მხარდამჭერი ძალიან ბევრი მყავს, ბევრად უფრო აქტიური ვარ, თუმცა ჩემს თემშიც თვალს მადევნებენ და იციან ჩემი აქტივობების შესახებ.
- შენი სამომავლო გეგმებიც გაგვაცანი
- ძალიან დიდი გეგმები მაქვს, რაც დიდწილად “თაობათა გზამკვლევს” და ჩემს კარიერულ მენტორობას უკავშირდება. მინდა, „თაობათა გზამკვლევი“ დიდ მასშტაბებზე გავიდეს და ამისთვის თავს არ დავზოგავ. ვიმედოვნებ, ახლო მომავალში ფიზიკურ ლოკაციაზე მუშაობასაც შევძლებთ. რაც შეეხება მენტორობას, ეს პროფესია საქართველოში აქტუალური თითქმის არ არის, ძალიან ცოტა კადრია და ქართველებს ჯერ არ აქვთ პროფორიენტაციის მენტორისგან დახმარების მიღების კულტურა, რადგან არც კი იცნობენ ჩვენს საქმიანობას. ასე რომ, ჩემს ერთ-ერთ მნიშვნელოვან მისიად ვთლი საქართველოში ამ პროფესიისადმი ცნობიერების ამაღლებას და რაც შეიძლება მეტი ადამიანის წარმატებაში წვლილის შეტანას. მაქვს სხვა გრანდიოზული გეგმებიც, თუმცა ჯერჯერობით მათ პირადად დავიტოვებ.
ესაუბრა ქეთი ოყროშიძე
