ბორჯომის მუნიციპალიტეტის საკრებულოს გენდერული თანასწორობის საბჭოს ორგანიზებით, სამუსიკო სკოლაში დედაენის დღისადმი მიძღვნილი ღონისძიება გაიმართა.
N1 საჯარო სკოლის მოსწავლემ ლიზი ჩხეტიამ, N3 საჯარო სკოლი მოსწავლემ მარიამ ტაბატაძემ და N6 საჯარო სკოლის მოსწავლეებმა ლიზა კობალაძემ და გვანცა მაისურაძემ ვრცლად ისაუბრეს ჩვენი მშობლიური ენის შესახებ, თუ როგორი დიდი მნიშვნელობა აქვს ქართულ ენას საქართველოს ისტორიაში, როგორ ცდილობდნენ მის შებღალვასა და მისი, როგორც სახელმწიფო ენის, გაუქმებას. ასევე, მათ კიდევ ერთხელ ისაუბრეს იაკობ გოგებაშვილის ღვაწლზე და მის მიერ შექმნილ ქართულ საგანძურ „დედაენაზე“.
„ღრმა,უნაპირო, ბრძენი, თავმდაბალი და მიუწვდომელია ენა ქართული, ვითარცა გონება და სიყვარული. მისი სათავე ისეთივე უცნობია, როგორც მელქისედეკ მამამთავრისა. მასშია მთელი საქართველო… სიტყვა მისი მჭრელია, ვით დავით აღმაშენებლის ხმალი, ძლიერია, როგორც სვეტიცხოველი და ნაზი, ვით ყვავილზე მარგალიტად დაკიდებული დილის ნამი „ – ქართული ენის შესახებ უწმინდესისა და უნეტარესის,სრულიად საქართველოს კათოლიკოს პატრიარქის სიტყვებიც შეახსენეს ახალგაზრდებმა მსმენელებს.
მერე კი სცენაზე ლექსებად დაიღვარა ქართველი მწერლების პოეზიის საუკეთესო ნიმუშები და მსმენელის გული თუ გონება კიდევ ერთხელ აღაფრთოვანა: „ო, ენევ, ჩემო, დედაო ენავ!“; „საქართველოს მთებში გაგაჩინა ზენამ, სიყვარულის, ლექსის და ღმერთების ენავ!“; „დედა ენა მზის სითბო და დარია, წმინდა ნინოს ვაზის ლერწმის ჯვარია!“; „რუსთაველის ტკბილ-ქართულის გვარია, იაკობის გალობა და ქნარია“!…
ღონისძიება მიმდინარეობდა სამუსიკო სკოლის მასწავლებლების: მარინა რატიანის, თეა მანჩხაშვილის, მარინა ქიტიაშვილის, მომღერალ ლევან ნოზაძისა და ანსაბლ „ოქტავას“ მიერ შესრულებული მუსიკალური ნაწარმოებების ფონზე.
დედაენის დღეს ესწრებოდნენ ბორჯომის მუნიციპალიტეტის საკრებულოს თავმჯომარის მოადგილეები: გიორგი ფერაძე, ჯუმბერ კურტანიძე, ნიკოლოზ კიკნაძე, გენდერული თანასწორობის საბჭოს წევრები, ბორჯომის მერიის კულტურის განყოფილების უფროსი შალვა გოგოლაძე, სკოლების დირექტორები და ქართული ენისა და ლიტერატურის მასწავლებლები.
ღონისძიების დასასრულს ბორჯომის მუნიციპალიტეტის ყველა სკოლას გენდერული თანასწორობის საბჭოსგან სიმბოლური საჩუქრები გადაეცათ
.
