მარიამ ლომიძე დაბა ახალდაბის საჯარო სკოლის მე-11 კლასის მოსწავლეა. ის მედიაკაფე „ლუტრეზი“-სთან არსებულ „სამოქალაქო ინიციატივების გენდერმედიაცენტრში“ გავიცანი და თავიდანვე მიიქცია ჩემი ყურადღება, როგორც მიზანსწრაფულმა, გონიერმა და აქტიურმა ახალგაზრდამ. მარიამმა გასულ წელს GLOW -ს გოგონათა საზაფხულო ბანაკში მიიღო მონაწილეობა და განსაკუთრებულად მოტივირებული დაბრუნდა თავის სოფელში.
მერე კი რამდენიმე აქტიური ახალგაზრდა მეგობარი გოგონაც დააინტერესა და მათთან ერთად ახალდაბაში გოგონათა კლუბი ჩამოაყალიბა. შემდეგ ის განსაკუთრებული მონდომებითა და აქტიურობით ატარებდა კლუბის წევრებისთვის ტრენინგებს თუ სხვადასხვა სახის აქტივობებს. 4 თვეში 22 პროექტის განხორციელება შეძლო. შედეგად კი კონკურსშიც გაიმარჯვა და GLOW -ს ორგანიზაციის გადაწყვეტილებით, ახალგაზრდა ელჩის ტიტული და პრაღის საგზურიც მოიპოვა. ის თებერვლის ბოლოს GLOW -ს ელჩების კონფერენციაში მიიღებს მონაწილეობას, ხოლო მაისის დასაწყისში, სხვა რეგიონებიდან გამარჯვებულ 5 გოგონასთან ერთად, ჩეხეთის დედაქალაქ პრაღაში გაცვლითი პროგრამით გაემგზავრება.
***
„GLOW საქართველო“ — არასამთავრობო ორგანიზაციაა, რომელიც 2014 წელს ჩამოყალიბდა. ორგანიზაცის ხედვაა, ხელი შეუწყოს გოგონების თავიანთ თემში ლიდერებად ჩამოყალიბებას და მათთვის წარმატების მიღწევის თანაბარი შესაძლებლობის უზრუნველყოფას. GLOW-ს ერთ-ერთი პოპულარული აქტივობა ზაფხულის ბანაკებია, რომელიც ყოველწლიურად იმართება ქალაქიდან მოშორებით, სადაც 100-ზე მეტი ახალგაზრდა გოგონა ერთი კვირის განმავლობაში იღებს ცოდნას და უნარ-ჩვევებს სხვადასხვა საინტერესო საკითხთან დაკავშირებით: ლიდერობა, სოლიდარობა, თანატოლებზე ზრუნვა, ცხოვრების ჯანსაღი წესი და რეპროდუქციული ჯანმრთელობა, პროექტების წერა და იმპლემენტაცია და მრავალი სხვა.
GLOW-ს პარტნიორია ჩეხურ ორგანიზაცია ,,აგორა» და სწორედ მასთან თანამშრომლობით გახდა შესაძლებელი, რომ ყველაზე აქტიური და კონკურსში გამარჯვებული გოგონები გაცვლითი პროგრამით პრაღაში გაემგზავრონ და ჩაერთონ Erasmus+ პროექტში «სამოქალაქო და ლიდერული უნარების განვითარება ქართველი და ჩეხი გოგონებისთვის“.
***
ჩვენ მარიამი მედიაკაფე „ლუტრეზი“-ში მოვიწვიეთ, მივულოცეთ ეს წარმატება და ვთხოვეთ, მოკლედ ეამბა, როგორ დაიწყო მისი ურთიერთობა GLOW -სთან და რამდენად ემოციურად აღიქვა ეს წარმატება.
მარიამ ლომიძე:
— პირველ რიგში, დიდ მადლობა მოწვევისთვის. რაც შეეხება GLOW -ს, ყველაფერი ზაფხულში დაიწყო, როდესაც მათ გვერდზე აპლიკაცია ვნახე, რომ ბანაკისთვის გოგონების არჩევა იწყებოდა. მეც გავაგზავნე აპლიკაცია, თუმცა, ალბათ, იმ დროს ვერ წარმოვიდგენდი, თუ GLOW ჩემი ცხოვრების ასეთი მნიშვნელოვანი ნაწილი გახდებოდა. მახსოვს, როგორ ვნერვიუოლობდი, როდესაც პასუხების დრო მოახლოვდა, ლამის იმედიც კი გადამეწურა, მაგრამ გამიმართლა და მეც აღმოვჩნდი იმ იღბლიანთა შორის, ვინც ბანაკისთვის შეირჩა. ვერ აღვწერ ჩემს ემოციებს, თუ რამდენად ბედნიერი და ემოციებით სავსე ვიყავი, ვხვდებოდი, რომ ძალიან მაგარი ამბები მელოდებოდა წინ!
— მაინც, რა მოგცა ამ ბანაკმა, რით იყო ის მნიშვნელოვანი შენთვის?
-პირველ რიგში, შევიძინე არაჩვეულებრივი მეგობრები. ჩემს ნაკადში 27 გოგონა ვიყავით, ყველა გავიცანი და უმეტესობას დავუახლოვდი. მათთან დღემდე ძალიან კარგი ურთიერთობა მაქვს და ძალიან მიყვარს თითოეული. უზომოდ თბილი, ნიჭიერი და მეგობრულები არიან. გარდა ამისა, GLOW —მ ფართო ხედვა და ღრმა ცოდნა მომცა ისეთ საკითხებზე, როგორიცაა სოლიდარობა, რეპროდუქციული ჯანმრთელობა, გენდერული საკითხები, დამეხმარა ლიდერული თვისებების განვითარებაში, კომპლექსების დაძლევაში და მომცა თავდაჯერება. ბანაკში ვისწავლე ასევე პროექტების წერა. GLOW -ს იდეაა, რომ იმ გოგონებმა, რომლებიც სხვადასხვა რეგიონებიდან არიან, სახლში დაბრუნების შემედეგ შექმნან გოგონათა კლუბები და გაუზიარონ მიღებული ცოდნა მათ. ასე შევქმენი მეც ახალდაბაში გოგონათა კლუბი.
— და კლუბის შექმნა როგორ მოახერხე? რთული აღმოჩნდა?რა იყო კლუბის მიზანი?
— უნდა ვაღიარო, რომ ამაზე ცოტა წვალება დამჭირდა. როდესაც სკოლის პერიოდი დაიწყო, სხვადასხა კლასის მოსწავლე გოგონებს ვხვდებოდი და ვესაუბრებოდი მათ ჩემი მიზნის შესახებ, მაგრამ რატომღაც ჩემს მონდომებას ისეთი დადებითი გამოხმაურება არ მოჰყვა, როგორსაც ველოდი, იყო ცინიზმიც კი ჩემს იდეასთან დაკავშირებით. თუმცა, გადავწყვიტე, რომ აღარ დამეყოვნებინა და ვინც შემომიერთდებოდა, მათთან ერთად განმეხორციელებინა პროექტები. თავიდან ვიყავით 8 გოგონა, მათი რაოდენობა სულ იცვლებოდა. საბოლოოდ დარჩა 5 , მაგრამ საუკეთესო გოგონა, რომლებიც ბოლომდე მხარში მედგნენ და ჩემს თითოეულ პროექტს დიდი გულმოდგინებითა და ენთუზიაზმით ესწრებოდნენ.
მინდა, რომ გაგაცნოთ ჩემი კლუბის წევრი გოგონები: ქეთევან ოყროშიძე, ანა კილასონია, ნინო ოყროშიძე, მარიამ გვირჯიშვილი და თიკო ბაშარული. საოცარი გოგონები არიან, პროექტის მიმდინარეობისას ისეთი აქტიურობით იჩენდნენ თავს, რომ მუდამ კმაყოფილებით ვიყავი სავსე, ძალიან მადლიერი ვარ მათი, რომ ბოლომდე ჩემს გვერდთ იდგნენ, და სწორედ მათი მხარდაჭერის დამსახურებაა, რომ გავიმარჯვე კონკურსში და გაცვლითი პროგრამის საგზური მოვიპოვე. დარწმუნებული ვარ, რომ თითოეულ მათგანს ასევე საოცარი წარმატება ელის წინ და უზომოდ კარგი მომავალი ექნებათ.
ამავე დროც ჩვენი კლუბის წარმატებასა და პროექტების განხორციელებაში ძალიან დიდია მედიაკაფე „ლუტრეზი“-ს მხარდაჭერა, სადაც ვიკრიბებოდით გოგონები და ამ არაჩეულებრივ კომფორტულ სივრცეში ვატარებდით ტრენინგებს, ვუყურებდით ფილმებს, ვაწყობდით სხვადასხვა ღონისძიებებს. ყოველივე ამისთვის კი დიდ მადლობას გიხდით, ქალბატონო ნატო, პირადად თქვენ, რომ ახალდაბაში მცხოვრები ახალგაზრდებისთვის ასეთი კომფორტული არაფორმალური გარემო შექმენით და ხელს უწყობთ მათ სხვადასხვა პროექტებში ჩართვით.
რაც შეეხება ჩემი კლუბის მიზანს, ეს იყო ჩვენს თემში მცხოვრები გოგონებისთის ცნობიერების ამაღლება გენდერულ საკითხებზე, ლიდერული თვისებების ჩამოყალიბება მათში, რის შემდეგაც ისინი თავადაც იაქტიურებენ ჩვენი თემის განვითარებისთვის.
— მარი, მადლობა თქვენ, ყველას, რომ ასეთი ძალიან ყოჩაღი გოგონები ხართ. ახლა კი გაგვიზიარე შენი ემოციები, როდესაც გაიგე, რომ გაცვლით პროგრამაში მონაწილეობისთვის აგირჩიეს.
— უდაოდ საუკეთესო დღე იყო ჩემს ცხოვრებაში, მე და ჩემმა კლუბმა ძალიან დიდი შრომა ჩავდეთ თითოეულ პროექტში და ეს შრომა რომ დამიფასდა ძალიან მიხარია, ძალიან დიდი მადლობა მინდა გადავუხადო გლოუს იმისათვის რომ ასეთი არაჩვეულებრივი შანსი მომცა. ნამდვილად ერთ-ერთი საუკეთესო ორგანიზაციაა.
— კიდევ ერთხელ გილოცავ ,16 წლის ასაკში ეს სერიოზული ამბებია კიდევ რა მიზნები გაქვს?
— ძალიან ბევრი მიზანი და გეგმა მაქვს, რისთვისაც თავს არ დავზოგავ , თუმცა, ჯერჯერობით იმ წარმატებით უნდა დავტკბე, რაც ამ პერიოდში მოხდა ჩემს თავს. დავრწმუნდი, რომ თუ შრომობ და მიზანი გაქვს, აუცილებლად დაფასდება. ამიტომ ვფიქრობ, ყველაზე მნიშვნელოვანი ეტაპი ჩემს ცხოვრებაში ახლა იწყება. მინდა, კიდევ ერთხელ მადლობა ვუთხრა იმ ადამიანებს, ვინც ხელი შემიწყვეს რომ ამ წარმატებამდე მივსულიყავი, დარწმუნებული ვარ, წინ კიდევ ბევრი საინტერესო რამ გველის.
ესაუბრა ნატო გუბელაძე
