ჯერ მხოლოდ ერთი წელია, რაც ეკა ორჯონიკიძე „ბაკურიანის განვითარების სააგენტო“-ს ხელმძღვანელად მუშაობს, თუმცა ამ პერიოდის განმავლობაში საკმაოდ თვალნათელია ის საქმეები და წარმატებები, რაც სააგენტომ ბაკურიანის განვითარების მიზნით გააკეთა. ბუნებრივია, რომ ჯერ კიდევ მრავალი გამოწვევაა დასაძლევი და გასაკეთებელიც ბევრია, თუმცა სტარტი აღებულია და წარმატებების მოლოდინიც მეტია. მითუმეტეს, თუ გავითვალისწინებთ იმ ფაქტს, რომ 2023-2025 წლები მართლაც გარდამტეხი იქნება ბორჯომის მუნიციპალიტეტის დაბა ბაკურიანის საერთაშორისო დონის კურორტად ჩამოყალიბების მხრივ. უკვე ცნობილია, რომ 2023 წლის 16 თებერვლიდან-5 მარტამდე ბაკურიანი მასპინძლობს ფრისტაილის, სნოუბორდისა და ფრისკის მსოფლიო ჩემპიონატს, ხოლო 2025 წელს — ევროპის ზამთრის მე-17 ახალგაზრდულ ოლიმპიურ ფესტივალს.
ამ ფონზე გაზეთი „ბორჯომიnews”-ი ქალბატონ ეკა ორჯონიკიძეს გაკეთებულ და გასაკეთებელ საქმეებზე ესაუბრა. გთავაზოთ ჩვენს დიალოგს.
- ქალბატონო ეკა, თქვენ ერთი წელია, რაც დაინიშნეთ „ბაკურიანის განვითარების სააგენტოს“ ხელმძღვანელად. რა გამოწვევების წინაშე აღმოჩნდით, რისი გაკეთება შეძელით ამ ერთი წლის მანძილზე?
- იანვარში შესრულდა ერთი წელი, რაც სააგენტოს ვხელმძღვანელობ და ვთვლი, რომ ამ მოკლე დროში ბევრი სასიკეთო საქმე გაკეთდა ბაკურიანისთვის. პირველ რიგში, აღვნიშნავ რომ სააგენტო დავაკომპლექტეთ პროფესიონალი კადრებით, რაც ძალიან მნიშვნელოვანია ნებისმიერი მიმართულებით საქმის ხარისხიანად და წარმატებით შესასრულებლად. პირველი იანვრიდან სააგენტოში ფუნქციონირებს ზედამხედველობისა და არქიტექტურის სამსახური, რამაც ხელი შეუწყო უკონტროლო და ქაოსური მშენებლობების აღკვეთას. ამავე დროს, სააგენტოს ინიციატივით დაინიშნა საზოგადოებრივი ტრანსპორტი, მოეწყო საპარკინგე ადგილები, ყოველდღიურად სუფთავდება ქუჩები, ჩიხები, ხდება ნარჩენების ხშირი გატანა. ასევე, მოქალაქეთა მომართვიანობის საფუძველზე ხორციელდება სააგენტოს სარგებლობაში არსებული ტექნიკით მომსახურების გაწევა. გასულ წელს სააგენტომ ასევე შეიმუშავა წესი, აკრძალულ ტერიტორიაზე მსხვილფეხა ან/ და წვრილფეხა პირუტყვის ყოლა/ყოფნის შესახებ.
- და მაინც, რა უმთავრესი პრობლემები დგას დღესდღეობით ბაკურიანის წინაშე და როგორ აპირებთ მის დაძლევას?
- ყველამ, ვისაც ბაკურიანთან რაიმე კუთხით შეხება აქვს, იცის, რომ უამრავი პრობლემის წინაშე დგას, რომელთაგან ზოგი გაცილებით მარტივად, ზოგი კი რთული გადასაჭრელია.ეს პრობლემები ათწლეულების განმავლობაში დაგროვდა და ყველა მიმართულებას შეეხება, იქნება ეს ქაოსური მშენებლობები, მოუწესრიგებელი ინფრასტრუქტურა, ლოჯისტიკა თუ სხვა. სწორედ ამან განაპირობა ბაკურიანის განვითარების სააგენტოს შექმნაც. დღესდღეობით მთავარ გამოწვევად კვლავ საცობები და საფეხმავლო ბილიკები რჩება, ასევე მწვავედ დგას წყლისა და წყალარინების საკითხი. იმისათვის, რომ ეტაპობრივად მოხდეს ამ გამოწვევების დაძლევა, სისტემატურად ვმართავთ უწყებათშორის საკოორდინაციო შეხვედრებს, სადაც განიხილება არსებული გამოწვევები და მათი გადაჭრის გზები. რაც მთავარია, პრობლემების აღმოსაფხვრელად ვმოქმედებთ თანმიმდევრულად, ორგანიზებულად და შეთანხმებულად!
- დამეთანხმებით, ალბათ, რომ ბაკურიანისთვის ერთ-ერთი ყველაზე მნიშვნელოვანი გამოწვევაა ის ფაქტი, რომ ის იქცეს საერთაშორისო დონის კურორტად, სადაც სხვადასხვა ჩემპიონატები გაიმართება და წელს უკვე ამ კუთხით დიდი გამოცდის წინაშეც დგას, რადგან 16 თებერვლიდან მსოფლიო ჩემპიონატის მასპინძლობა უწევს. გთხოვთ, გვიამბოთ კონკრეტულად რა გაკეთდა ინფრასტრუქტურის თუ სხვა მხრივ იმისათვის, რომ ღირსეულად დავაკმაყოფილოთ ამ კუთხით არსებული საერთაშორისო სტანდარტები.
- დიახ, როგორც აღნიშნეთ, 16 თებერვლიდან 5 მარტის ჩათვლით ბაკურიანი მასპინძლობს ფრისტაილის, სნოუბორდისა და ფრისკის მსოფლიო ჩემპიონატს. ეს ჩემპიონატი, რა თქმა უნდა, ძალიან მნიშვნელოვანი და წინგადადგმული ნაბიჯია ბაკურიანისთვის, როგორც საერთაშორისო დონის კურორტად ჩამოყალიბებისთვის და აუცილებელია, რომ ყოველმხრივ მომზადებულები შევხვდეთ და ღირსეულად ვუმასპინძლოთ მას.
ამისათვის სააგენტო აქტიურად მუშაობს: ხდება ჩიხებისა და გზების ყოველდღიური დასუფთავება, ნარჩენების გატანა, ზედმიწევნით სრულდება ყველა ის სამუშაო, რაც სააგენტოს კომპეტენციას მიეკუთვნება.
რაც შეეხება ინფრასტრუქტურას, როგორც მოგეხსენებათ, პრემიერ–მინისტრის მიერ ინიცირებული ,,განახლებული რეგიონების’’ პროექტის ფარგლებში განხორციელდა ბაკურიანის ცენტრალური ქუჩის რეაბილიტაცია, რაც გულისხმობს საერთო ღობეების მოწყობას და ახალი ჯიხურების განთავსებას.
მიმდინარე წელს, პროექტის ფარგლებში, დიდველისა და მიტარბის არეალში, გათოვლიანების სისტემის ფუნქციონირებისთვის აუცილებელი წყლის ორი ხელოვნური რეზერვუარი აშენდა, ასევე აშენდა ექვსი ახალი საშეჯიბრო ტრასა. დიდველი-კოხტა მიტარბის არეალში კი მიმდინარეობს 29 კმ-იანი ხელოვნური გათოვლიანების სისტემის მონტაჟი.
- ქალბატონო ეკა, მიმდინარე წელს რა არის სააგენტოს მთავარი პრიორიტეტები, რისი გაკეთება გაქვთ დაგეგმილი?
- მიმდინარე წელს სააგენტო გეგმავს საზოგადოებრივი ტრანსპორტისთვის გაჩერებების მოწყობას, ასევე — დამატებითი საპარკინგე სივრცეების გამოყოფას. დაგეგმილია პრემიერმინისტრის ინიცირებული პროგრამის – ,,განახლებული რეგიონების“ პროექტის გაგრძელება, რომელიც დასრულდება 2023 წლის ბოლოს. სააგენტო აქტიურად მუშაობს ბაკურიანის ბოტანიკური ბაღის, ასევე ,,კუკუშკის» რეაბილიტაციის პროექტზე, მიმდინარეობს მოლაპარაკებები კომპანიებთან, საჰაერო კომუნიკაციების მიწისქვეშ ჩატანასთან დაკავშირებით, რაც ბაკურიანის იერსახეს მოაწესრიგებს.
- ძალიან მნიშვნელოვანია, რომ ასეთ სერიოზულ თანამდებობას ქალი უძღვებით, რამდენად ახერხებთ, რომ ადგილზე ხელი შეუწყოთ გენდერული სტერეოტიპების მსხვრევას?
- ჩემთვის ძალიან მნიშვნელოვანი და ამავდროულად საპასუხისმგებლოა ამ თანამდებობაზე ყოფნა. ვთვლი, რომ არათუ სასურველი, არამედ აუცილებელი და პოზიტიური შედეგების გარანტიც კია ბევრ წამყვან პოზიციაზე ქალების დასაქმება. ჩვენი სააგენტო აქტიურად უწყობს ხელს გენდერული სტერეოტიპების მსხვრევას . აღსანიშნავია, რომ სააგენტოში შტატით დასაქმებულთა უმეტესობა ქალია, მათგან ორი კი გადაწყვეტილების მიმღებ პოზიციაზე. სააგენტოში ვაკანსიის გამოცხადებისას აუცილებლად ვუთითებთ, რომ ბაკურიანის განვითარების სააგენტო წაახალისებს ქალ კანდიდატებს კონკურსში მონაწილეობის მისაღებად.
- წარმატებებს გისურვებთ, ქალბატონო ეკა!
ნატო გუბელაძე
