ბორჯომის მუნიციპალიტეტმა, სოციალური პროგრამების ფარგლებში, იანვრის თვეში 238 909 ლარის დაფინანსება გასცა. აღნიშნული თანხით, მუნიციპალიტეტმა დახმარება 755 ბენეფიციარს გაუწია.
138 959 ლარი, 148 მოქალაქის სტაციონარული მომსახურებისათვის გამოიყო. მედიკამენტების შესაძენად 91 ბენეფიციარი 16 571 ლარით დაფინანსდა.
ონკოლოგიური დაავადებების მქონე 37 პაციენტი 27 310 ლარით დაფინანსდა.
105 მრავალშვილიანი ოჯახი 25 250 ლარით დაფინანსდა.
სოციალური პროგრამების მიხედვით, დახმარება მიიღეს შშმ პირებმა, დედ–მამით ობლებმა და სხვა.
ბორჯომის მუნიციპალიტეტის მერია მოსახლეობის დაავადებათა პრევენციის შემდგომი მკურნალობის ხელშეწყობისა და სოციალური პირობების გაუმჯობესების მიზნით, 23 პროგრამას ახორციელებს.
2023 წელს 10 პროგრამაში ცვლილება განხორციელდა:
ამჯერად ერთიანად წარმოგიდგენთ ამ პროგრამების ცვლილებებს, ხოლო შემდგომ ნომრებში ცალ-ცალკე შემოგთავაზებთ, თუ როგორ უნდა ისარგებლოთ თითოეული პროგრამით, ვის უნდა მიმართოთ და რა დოკუმენტაციის წარმოდგენაა საჭირო შესაბამის სამსახურებში.
1. ცვლილება შევიდა სტაციონარულ მომსახურების პროგრამაში. კერძოდ, სრული დაფინანსება გაეწევათ კარდიოლოგიურ პაციენტებს წლის განმავლობაში 2500 ლარის ოდენობით. დაფინანსება ითვალისწინებს კალენდარული წლის განმავლობაში ფინანსური დახმარების გაწევას მხოლოდ კარდიოქირურგიული ჩარევის თანაგადახდისას, ასევე მაღალტექნოლოგიური კვლევების ჩატარებას.
2. ახალდაბადებული ბავშვიანი ოჯახების დახმარება. ახალშობილის შეძენის შემთხვევაში ყველა ოჯახი მიიღებს 1000 ლარს ერთჯერადად, რაც გავლენას იქონიებს დემოგრაფიული მდგომარეობის გაუმჯობესებაზე. ოჯახი ტყუპი ახალშობილის შეძენის შემთხვევაში ორმაგ თანხა მიიღებს.
3. 18 წლამდე ასაკის ოთხი და მეტშვილიანი ოჯახების დახმარება. ბორჯომის მუნიციპალიტეტის მერიისგან მრავალშვილიანი ოჯახები მიმდინარე წლიდან 50 ლარით მეტ დახმარებას მიიღებენ. ქვეპროგრამის ფარგლებში,18 წლამდე ასაკის ოთხი და მეტ შვილიანი ოჯახები, რომლებიც რეგისტრირებული არიან სოციალურად დაუცველი ოჯახების მონაცემთა ერთიან ბაზაში და მინიჭებული აქვთ სარეიტინგო ქულა 0-დან160 000-მდე, ყოველთვიურად 250 ლარს მიიღებენ და ყოველ მომდევნო შვილზე დამატებით 50 ლარი. ხოლო, 200 ლარს ის ოჯახები მიიღებენ, რომლებიც არ არიან რეგისტრირებული სოციალურად დაუცველი ოჯახების მონაცემთა ერთიან ბაზაში. ასევე 200 ლარით ყოველთვიურად დაფინანსდებიან 18 წლამდე ასაკის ის სამშვილიანი ოჯახები, რომელთაც ერთ-ერთი შვილი შშმ პირი ჰყავთ.
4. მოსახლეობის მედიკამენტებით უზრუნველყოფის პროგრამა. ბორჯომის მუნიციპალიტეტის მერია ერთჯერადად 200 ლარით დაეხმარება საპენსიო ასაკის სოციალურად დაუცველ იმ ბენეფიციარების, რომელთა სარეიტინგო ქულა 65 000-ს შეადგენს.
5. 18 წლამდე ასაკის შშმ პირების დახმარების პროგრამა. პროგრამაში დაემატა საკურორტო მომსახურება 0-დან 18 წლამდე ასაკის შშმ პირებზე. კერძოდ: დახმარება მიეცემა ბორჯომის მუნიციპალიტეტის ტერიტორიაზე რეგისტრირებულ 0-დან 18 წლამდე ასაკის შშმ პირებს. ერთ ბენეფიციარზე საკურორტო მომსახურება განკუთვნილია ერთჯერადად არაუმეტეს 800 ლარის ოდენობით. ვაუჩერის მფლობელს უფლება აქვს, ისარგებლოს მისი კანონიერი წარმომადგენლის მიერ შერჩეულ საქართველოს კურორტებზე არსებულ სასტუმროებში ან კერძო გამქირავებელთან 6 ღამით. ბენეფიციარის დაფინანსება მოხდება მის კანონიერ წარმომადგენელთან ერთად. ბენეფიციარის კანონიერმა წარმომადგენელმა მუნიციპალიტეტის მერიაში უნდა წარმოადგინოს: განცხადება მუნიციპალიტეტის მერის სახლზე; განმცხადებლის პირადობის დამადასტურებელი დოკუმენტი და ბენეფიციარის დაბადების მოწმობა; დახმარების მიმღების მიერ არჩეული სასტუმროს რეკვიზიტები და ინვოისი ან კერძო გამქირავებელთან (შემოსავლების სამსახურში გადამხდელად რეგისტრირებული) დადებული ხელშეკრულება და გადამხდელის დამადასტურებელი საბუთი. თანხის გადარიცხვა მოხდება სასტუმროდან წარმოდგენილი შესრულებული მიღებული მომსახურების საფუძველზე.
6. შშმ პირების დღის ცენტრების ხელშეწყობის ქვეპროგრამა. კერძოდ, დღის ცენტრის ბენეფიციარების ტრანსპორტით უზრუნველყოფა.
7. მარტოხელა მშობლების დახმარების პროგრამა. ქვეპროგრამა ითვალისწინებს იმ მარტოხელა მშობლების (დედა/მამა) ყოველთვიურ დახმარებას 100 ლარის ოდენობით, რომლებსაც სახელმწიფო სერვისების განვითარების სააგენტოს მიერ მინიჭებული აქვთ მარტოხელა მშობლის სტატუსი.
8. სოციალურად დაუცველი მოსახლეობის კომუნალური სუბსიდირება ზამთრის სეზონთან დაკავშირებით. ქვეპროგრამა ითვალისწინებს 200 ლარით დახმარებას იმ იოჯახებზე, რომლებსაც 70 000-მდე ქულა აქვთ მინიჭებული.
9. ონკოლოგიური პაციენტების დახმარების პროგრამა. პროგრამით ისარგებლებენ I, II და IV კლინიკური ჯგუფის ონკოლოგიური პაციენტები საჭიროებების მიხედვით. კერძოდ: ა) სადიაგნოსტიკო მაღალტექნოლოგიური კვლევების დაფინანსება ქიმიოთერაპიის კურსის მიმდინარეობისას; ბ) ოპერაციული მკურნალობის თანადაფინანსება; გ) ქიმიოთერაპიის კურსის თანადაფინანსება საყოველთაო ან კერძო დაზღვევის შემდგომ დარჩენილ თანხაზე. მაქსიმალური გასაცემი თანხა 2500 (ორი ათას ხუთასი) ლარი. ხოლო, III და IV კლინიკური ჯგუფის ონკოლოგიურ პაციენტებს, რაიონის ონკოლოგის ან ოჯახის ექიმის მიერ შევსებული ფორმა #100-ის (ჩანაწერი მედიკამენტების ჩამონათვალით), რეცეპტის და აფთიაქიდან წარმოდგენილი კალკულაციის(დედანი) საფუძველზე გაეწევათ დახმარება ერთჯერადად 150 ლარის ოდენობით.
10. ბავშვის უფლებების დაცვისა და მხარდაჭერის პროგრამა. ქვეპროგრამა ითვალისწინებს კრიზისულ მდგომარეობაში მყოფი ბავშვის ოჯახის ყოველთვიურ ფულად დახმარებას ბავშვის ინდივიდუალური მხარდაჭერის გეგმის მოქმედების ვადით ოჯახში მცხოვრებ თითოეულ ბავშვზე 100 (ასი) ლარის ოდენობით, რომელიც მოხმარდება საკვები პროდუქტის, ჰიგიენური საშუალებების, ბავშვის ხელოვნური საკვებისა და ჰიგიენური საფენების შეძენას.
