პარლამენტის წევრმა ანტონ ობოლაშვილმა, რომელიც ახალციხის, ასპინძის, ადიგენის და ბორჯომის მაჟორიტარი დეპუტატია, ეკონომიკისა და მდგრადი განვითარების მინისტრს ლევან დავითაშვილს რამდენიმე კითხვა დაუსვა. ლევან დავითაშვილი საკანონმდებლო ორგანოში „მინისტრის საათის“ ფორმატში იმყოფებოდა.
„2022 წლის გეგემის მიხედვით ტენდერები უკვე ჩატარებულია და დაიწყება სამუშაოები რეგიონის 14 სოფელში. ამის შემდეგ, კიდევ გვრჩება 59 სოფელი გაზიფიცირების გარეშე. მინდა გთხოვოთ, რომ მოგვაწოდოთ ინფორმაცია, 2023 წელს ახალციხეში, ადიგენში, ასპინძაში და ბორჯომის სხვა მუნიციპალიტეტებში დაგეგმილი გაზიფიცირების ახალი პროექტების შესახებ“ – განაცხადა ანტონ ობოლაშვილმა. მისივე თქმით, გაზიფიცირების პროექტი უნდა გაგრძელდეს რეგიონის სრულ გაზიფიცირებამდე.
ასევე, მაჟორიტარი პარლამენტარი ბორჯომის წყალზე არსებული მოსაკრებელის გაზრდის საკითხსაც შეეხო. მისი თქმით, ბორჯომის ქარხანა მუნიციპალიტეტში ბევრ კარგ საქმეს აკეთებს, ბევრ სოციალურ პროექტს ახორციელებს და რაც ყველაზე მთავარია, ასაქმებს ბევრ ბორჯომელს, თუმცა, გადასახედია ბორჯომის წყალზე დაწესებული მოსაკრებელის ოდენობა, რათა მუნიციპალიტეტის შემოსავლები გაიზარდოს, რაც ასევე მოსახლეობის ინტერესებს მოხმარდება.
„ბორჯომის მუნიციპალიტეტს ამ ნაწილში უნდა ჰქონდეს მეტი შემოსავალი, რაც გაზრდის მუნიციპალიტეტის ბიუჯეტს, მოხმარდება ბორჯომის მუნიციპალიტეტის მიერ განსაზღვრული პრიორიტიტული მიმართულებების განხორციელებას მათი განვითარების მხრივ. მე მიმაჩნია, რომ მოსაკრებლის თანხა უნდა გაიზარდოს მინიმუმ სამჯერ… მოსაკრებლის ამ ოდენობით გაზრდა არ მოახდენს არსებით გავლენას მწარმოებელი კომპანიის ფინანსურ ხარჯებზე და წესით არ უნდა აისახოს მის გასაყიდ ფასზე“ – განაცხადა ანტონ ობოლაშვილმა.
დეპუტატმა ეკონომიკისა და მდგრადი განვითარების მინისტრს, ბაკურიანის მიმდებარე – ცემის და ასპინძაში – ვარძიის მიმდებარე ტერიტორიების სივრცითი მოწყობა-განვითარების გენერალური გეგმების შემუშავებისა და დამტკიცების შესახებ დაუსვა კითხვა. როგორც ანტონ ობოლაშვილმა აღნიშნა, ეს მშენებლობის და ტურისტული ინფრასტრუქტურის სწორად განვითარების საშუალებას მოგვცემს, მოიზიდავს ინვესტორებს, დასაქმდება მეტი ადამიანი და რეგიონის ეკონომიკა განვითარდება.
„გთხოვთ მოგვაწოდოთ მეტი ინფორმაცია, დასრულებული და ასევე მიმდინარე სამუშაოების შესახებ“ – მოითხოვა დეპუტატმა მინისტრისგან.
ლევან დავითაშვილმა დეპუტატის მხრიდან დასმული კითხვების პასუხად განაცხადა, რომ გაზიფიცირებასთან დაკავშირებით, სამწუხაროდ, რამდენიმე ტიპის საკითხი არის გადასაწყვეტი.
„ბევრ ადგილას შეიქმნა ახალი ინფრასტრუქტურა, მოხდა გაყვანა ახალი ხაზების, მაგრამ ვერ ხდებოდა დაერთება და მოსახლეობის ჩართვა… აქ ყველაზე მთავარი პრობლემა არის ის, რომ სოკარის ან ძირითადი ოპერატორების ინტერესები არ არის გათვალისწინებული ტარიფში, შესაბამისად არის ხარჯები და არის არაადეკვატური სიტუაცია. ვმუშაობთ ინტენსიურად ენერგეტიკის მარეგულირებელ კომისიასთან და დარმწუნებული ვარ, რომ უახლოეს ხანებში კომისია გაითვალისწინებს ამ ნიუანსებს და ყველა ის პობლემური პროექტი თუ სოფელი, სადაც ჩაბარების პრობლემა იყო, მოგვარდება და დაერთება მოხდება ყველგან იქ, სადაც ჩვენ უკვე გვაქვს ინფრასტრუქტურა“ – განაცხადა მინისტრმა. მისივე თქმით, რაც შეეხება უშუალოდ სოფლებს, 2023 წლის სამუშაოებზე გამოცხადებული ტენდერების ნაწილი უკვე დასრულებეულია, უახლოეს ხანებში ყველა ტენდერი დასრულდება და ის საბიუჯეტო ასიგნებები, რომელიც ამ მიმართულებით არის გამოყოფილი, სრულად იქნება ათვისებული. „სახელმწიფო წელიწადში ას მილიონამდე ლარს ხარჯავს ამ მიმართულებით“ – აცხადებს მინისტრი.
რაც შეეხება ბორჯომის წყლის მოსაკრებლის გაზრდას, ლევან დავითაშვილის თქმით, არა მხოლოდ ბორჯომის, არამედ ზოგადად მინერალური რესურსების ეფექტიანად გამოყენების კუთხით, უფრო მკაფიო პოლიტიკა გვჭირდება. შეიძლება გადაიხედოს მოსაკრებლები, რომლებიც ადგილობრივ ბუჯეტში მიდის და ადგილობრივი მოსახლეობის ინტერესებს ემახურება, მაგრამ აქ საჭიროა ჩატარდეს ზემოქმედების შეფასება ბიზნესზე და ბიზნესის აქტიური ჩართულობით უნდა მოხდეს ამ გადაწყვეტილების მიღება.
ასევე, მინისტრმა, ცემის და ასპინძის მიმდებარე ტერიტორიების სივრცით დაგეგმარებასთან დაკავშირებით, დეპუტატის კითხვის პასუხად განაცხადა, რომ ბორჯომ-ბაკურიანის ხეობა ხელისუფლების ერთ-ერთი პრიორიტეტია. შესაბამისად, კურორტების განვითარების კუთხით, ერთ-ერთი ყველაზე უფრო პრიორიტეტული მიმართულება ზუსტად ამ ხეობის სწორი სივრცითი დაგეგმვა არის. „ამიტომ, უახლოეს ხანებში, ჩვენ დავიწყებთ შესყიდვების პროცესს სივრცითი გეგმების შეძენასთან დაკავშირებით, რასაც თავისი დრო გააჩნია, რა თქმა უნდა, მაგრამ ეს არის ერთ-ერთი პროიტეტი ჩვენს გეგმებში“ – განაცხადა ლევან დავითაშვილმა.
